.webp){kind=icon}
„Нетфликс“ (Netflix Inc.) гледа кон Азија по шокантното забавување на компанијата во првиот квартал, настојувајќи да го одржи растот во регион каде што сè уште додава нови претплатници и да го повтори својот успех таму во други делови од светот.
И покрај плановите за ограничување на севкупните трошоци, инвестициите во Азија ќе продолжат да растат, вклучително и финансирањето за продукција на локални филмови и серии, рече во интервју Тони Замечковски, потпретседател за развој на бизнисот за Азија-Пацифик.
Иако „Нетфликс“ низ Азија ќе продолжи да нуди евтино членство преку мобилни телефони, исто така бара повеќе партнерства со оператори и компании за дигитално плаќање за да допре до повеќе потенцијални клиенти во регион каде што користењето кредитни картички е поретко, објаснува Замечковски. Стратегијата на компанијата за Азија обезбедува потези и за другите пазари во развој, каде што платформата исто така мора да расте за да ја избалансира заситеноста во Северна Америка и Европа.
Bloomberg
„Азија е одличен примерок за другите пазари во светот“, вели Замечковски. „Постојат сличности помеѓу Азија во развој и другите пазари во развој како Африка и Латинска Америка. Добиените сознанија овде може лесно да се реплицираат или да се искористат во тие региони“.
Најголемата светска платформа за стриминг е во критичен момент. Акциите пораснаа во последните години бидејќи бројот на претплатници растеше, но компанијата ја пријави својата прва загуба на клиенти по повеќе од една деценија во април и предвидува уште едно намалување овој квартал поради жестоката конкуренција од ривалите. Со повеќе од 70 отсто од нејзината пазарна вредност збришана од средината на ноември, „Нетфликс“ е под притисок да го обнови каналот на содржини што го изгуби сјајот, а истовремено да ги намали трошоците.
Компанијата веќе се отвори кон регионот Азија -Пацифик, но поширокото забавување дава дополнителен поттик да се надоврзе на успехот на јужнокорејските мега-хитови како „Squid Game“ и „Hellbound“, кои ги зголемија претплатите.
Азиско-пацифичкиот регион учествува со 15 отсто во бројката од 221,6 милиони глобални претплатници на „Нетфликс“ и се прогнозира дека ќе биде најголемиот двигател за понатамошно проширување. По разочарувачкиот почеток на годината, аналитичарите очекуваат закрепнување на компанијата во втората половина, со додадени околу 6,8 милиони членови за целата година, од кои 79 отсто од Азија -Пацифик.
Сепак, многуте различните публики, преференци и опкружувања за работа во регионот претставуваат ризици. Новите корисници во азиско-пацифичкиот регион достигнаа вкупно 1,1 милион во првиот квартал, што е пад од 20 отсто од претходната година, а компанијата се соочи со културни и политички предизвици при навлегувањето на некои пазари. Серијата „A Suitable Boy“ предизвика контроверзии во Индија во 2020 година поради сцената на која се прикажува хинду-протагонистка како се бакнува со муслиман, а компанијата отстрани и шоу за виетнамската публика откако владата реагираше дека мапа во него ги прекршува законите за суверенитет.
Клиентите на „Нетфликс“ во Азија се исто така едни од оние што носат најниска вредност, што значи дека се потребни многу повеќе претплати за да се задоволат приходите.
Додека главните конкуренти на компанијата воведоа нивоа на цени, како што се плановите само за мобилни телефони, „Нетфликс“ оди понатаму од тоа за да привлече претплати преку иновативни начини на плаќање, како на пример дозволување на корисниците да ги вклучат своите претплати во нивните месечни телефонски сметки или да плаќаат преку дигитални паричници.
„'Нетфликс' во Азиа нуди поширок опсег на избор за плаќање отколку конкурентите“, вели Вивек Коуто, извршен директор на Media Partners Asia.
Бројот на нови членови што се регистрираа минатата година користејќи алтернативни начини на плаќање се зголеми за повеќе од тројно од претходната година, а овие мерки беа усвоени и на други пазари по нивното успешно лансирање во Азија, тврдат од „Нетфликс“.
Азија, исто така, би можела да биде дел од најновиот план на „Нетфликс“ за зголемување на приходите преку воведување реклами. Додека Замечковски вели дека е премногу рано да се каже на кои пазари компанијата ќе го лансира новиот модел, тој верува дека тоа ќе ја направи платформата подостапна за клиентите.
„Иако компанијата влегува во нова фаза на побавен раст, Азија е многу возбудлива и нуди многу можности. Ние само што почнуваме“, дециден е тој.
