.webp){kind=icon}
Фондацијата Отворено општество, непрофитна организација основана од милијардерот Џорџ Сорос, планира да намали најмалку 40 проценти од својот персонал во наредните месеци.
Добротворната организација, која претходно овој месец потврди дека Сорос (92) му ја предава контролата на неговиот син Алекс, во петокот соопшти дека нејзиниот одбор одобрил „значителни промени“ во моделот на работа. Тоа вклучува „значително намалување на бројот на вработени, не помалку од 40 проценти на глобално ниво“, соопшти портпаролот на Фондацијата.
Сорос донираше повеќе од 32 милијарди долари на непрофитната организација, која имаше повеќе од 500 вработени до крајот на 2021 година и дава пари за хуманитарни и демократски цели, од реформи во кривичната правда до иницијативи за климатски промени. Во моментов го контролира најголемиот дел од имотот управуван од неговата семејна канцеларија од 25 милијарди долари.
„Одборот има за цел да ги трансформира операциите низ глобалната мрежа, со цел да генерира попргава организација“, се вели во соопштението потпишано од помладиот Сорос и претседателот на непрофитната организација Марк Малох-Браун. „Додека Отворено општество работи на овие внатрешни промени, Одборот останува цврсто посветен на основните приоритети на Фондацијата - демократија, човекови права, климатска правда и справување со нееднаквоста“.
Најголемиот трошок на непрофитната организација во 2021 година беа надоместоците за вработени, според нејзиниот најнов достапен даночен формулар. Таа потроши речиси 72 милиони долари за плати и уште 40 милиони долари за бенефиции и пензиски планови.
Алекс Сорос (37) рече дека е „пополитички настроен“ од неговиот татко во неодамнешното интервју за „Волстрит журнал“. Тој додаде дека е загрижен за потенцијалното управување на Доналд Трамп во Белата куќа. „Колку и да сакам да ги извлечам парите од политиката, се додека другата страна го прави тоа, ќе мора да го правиме и ние“, изјави тој за весникот.
Алекс Сорос неодамна се состана со претставници на администрацијата на Бајден, лидерот на мнозинството во Сенатот Чак Шумер, бразилскиот претседател Луис Инасио Лула да Силва и канадскиот премиер Џастин Трудо за да се заложат за прашања поврзани со семејната фондација, објави „Журнал“.
Роден во Унгарија, Џорџ Сорос е познат како главен поддржувач на либералните каузи и демократските политичари и долго време е мета на политичката десница. Тој го основа Сорос Фонд Менаџмент и заработи богатство со големи облози, вклучително и неславниот облог против британската фунта. Тој го претвори фондот во семејна канцеларија во 2011 година. Неговата фондација досега потрошила 19,1 милијарди долари.
