Хеџ-фондовите и другите менаџери на пари сè повеќе се потпираат на ЧетГПТ (ChatGPT) за маркетинг и за сумирање големи извештаи, според ново истражување.
Четириесет и четири проценти од менаџерите на пари користат алатки за вештачка интелигенција за професионални потреби, се наведува во извештајот на „БНП Парибас“ (BNP Paribas SA). Повеќето користат ЧетГПТ за генерирање маркетиншки текстови или за сумирање обемна документација, како што се регулаторните поднесоци или извештаите за истражувања на брокерите.
Некои од анкетираните менаџери велат дека би сакале да користат ЧетГПТ за анализа на правни документи.
Алатките за генеративна вештачка интелигенција, како што е ЧетГПТ во сопственост на „Опен еј-ај“ (OpenAI Inc.), брзо станаа популарни меѓу менаџерите на пари, бидејќи технологијата може да следи упатства и да генерира содржина.
Depositphotos
Во март, Кен Грифин од „Цитадел“ (Citadel) рече дека неговата компанија преговара за лиценца за користење на ЧетГПТ во претпријатието, обложувајќи се дека системот ќе автоматизира „огромен дел од работата“. Гигантот на хеџ-фондовите „Ман груп“ (Man Group) исто така ја користи технологијата за откривање повторливи шеми во академските трудови и се обидува да ја пренесе основната дејност за односи со инвеститорите на алатките за вештачка интелигенција.
На прашањето како ќе влијае вештачката интелигенција на алтернативното управување со средства во следните шест до 12 месеци, менаџерите на пари генерално предвидуваат големи промени - вклучувајќи и намалување на работната сила и нарушување на пазарите за кодирање. Од посветлата страна, менаџерите сметаат и дека вештачката интелигенција ја зголемува деловната ефикасност.
Усвојувањето на технологијата „ја спушта летвичката за помалите фондови да бидат поконкурентни со поголемите организации“, изјави еден од испитаниците за БНП.
Извештајот на БНП анкетираше 39 лица чии компании управуваат со имот од 250,5 милијарди долари. Речиси 70 отсто од испитаниците биле од САД. Квант-компаниите одамна ја вградија технологијата на вештачка интелигенција во своите модели.
.webp){kind=icon}
