Кина ќе забранува ајфони во агенции и во државни компании

Кина планира да ја прошири забраната за употреба на телефони ајфон (iPhone) во чувствителните оддели на агенциите што ги поддржува Владата и државните компании, што е знак за растечките предизвици за „Епл“ (Apple Inc.) на неговиот најголем странски пазар и глобалната производствена база.

Неколку агенции почнаа да им укажуваат на вработените да не ги носат своите ајфони на работа, велат луѓе што се запознаени, потврдувајќи ја претходната објава на „Волстрит журнал“ (Wall Street Journal). Покрај тоа, Пекинг има намера да го прошири тоа ограничување многу пошироко, и во мноштво државни претпријатија и други организации контролирани од владата, велат изворите што бараа да останат анонимни. 

Ако Пекинг продолжи вака, блокадата без преседан ќе биде кулминација на долгогодишните напори за искоренување на употребата на странска технологија во чувствителните средини, што се совпаѓа со напорите на Пекинг да го намали своето потпирање на американскиот софтвер. Тоа се заканува да ја наруши позицијата на „Епл“ на пазарот што дава околу една петтина од неговите приходи и каде што произведува поголем дел од светските ајфони преку големите фабрики што вработуваат милиони Кинези.

Не е јасно колку компании или агенции на крајот би можеле да усвојат некакви ограничувања за употреба на личните уреди, а сè уште нема формална или писмена забрана, велат изворите. Државните фирми веројатно ќе се разликуваат во тоа колку строго ги спроведуваат таквите забрани, при што некои ќе забрануваат уреди на „Епл“ (Apple) на работното место, додека други би можеле целосно да им забранат на вработените да ги користат.

Bloomberg

Кинеските државни фирми, како нафтениот гигант „Петрочајна“ (PetroChina Co.), вработуваат милиони и контролираат огромни делови од централно планираната економија. Со оглед на односот на „Епл“ со Пекинг и неговата важност за економијата, тој „историски се сметаше за релативно безбеден во Кина кога станува збор за владините ограничувања“, изјави аналитичарот Брендон Ниспел од „Кибанк капитал маркетс“ (KeyBanc Capital Markets), во својата објава насловена „Дали владата го менува својот став?“.

Претставник на „Епл“ со седиште во Купертино, Калифорнија, не одговори на барањето за коментар. Комисијата за надзор и администрација на имотот во државна сопственост и Канцеларијата за информации на Државниот совет исто така не испратија одговор.

Изгледите дека Кина може да му наштети на „Епл“ ги вознемирија инвеститорите во средата. Акциите се лизнаа за 3,6 отсто во Њујорк, што е нивен најголем пад во еден ден од 4 август. „Епл“ имаше добивка од 46 проценти оваа година пред падот, што, пак, е дел од поширокиот раст на технолошките акции.

Компанијата ужива широка популарност во Кина, и покрај зголеменото незадоволство од американските напори да ја ограничи технолошката индустрија на азиската земја. Ајфоните на „Епл“ се меѓу најпродаваните во нацијата и се вообичаени и во државниот и во приватниот сектор.

Но, блокадата на уредите се совпаѓа со засилените напори за развој на домашната технологија, која може да се совпадне или дури и да ја надмине американската иновација. Минатата недела објавувањето паметен телефон „хуавеј“ (Huawei Technologies Co.), кој содржеше напреден процесор направен во Кина, предизвика мешаница на двете страни на Пацификот. 

Со помош на Марк Гурман, Јинг Цао и Џесика Суи

Во моментов нема коментари за веста. Биди прв да коментира...

Остави коментар