.webp){kind=icon}
Кинескиот БЈД (BYD Co.) се подготвува да ја престигне „Тесла“ (Tesla Inc.) на позицијата најголем продавач на електрични возила во светот, бидејќи продажбата на азискиот производител напредува на глобално ниво.
Најпродаваниот автомобилски бренд во Кина се најде на само еден чекор од победа над „Тесла“ во минатиот квартал, откако прекините на производството во фабриките доведоа до првиот пад во бројот на испорачани возила од страна на американскиот производител во последните 12 месеци.
БЈД продаде 431.603 целосно електрични возила во кварталот што заврши на 30 септември, што е за 23 отсто повеќе од вториот квартал. „Тесла“ испорача 435.059 автомобили низ светот во овој квартал - што значи дека разликата сега е 3.456 eдиници, најмалку досега.
„БЈД ќе продаде повеќе електрични патнички возила од 'Тесла' во четвртиот квартал“, вели Тејлор Оган, управен директор на хеџ-фондот „Сноу бул“ (Snow Bull Capital) со седиште во Шенжен, кој поседува акции од двата производитела на автомобили.
Акциите на БЈД паднаа за цели 3,6 отсто во Хонгконг во вторникот наутро, а и самиот индекс Hang Seng забележа пад и го достигна најниското ниво од ноември 2022 година. Другите кинески производители на електрични возила, како „Ли ауто“ (Li Auto Inc.) и „Гили“ (Geely Automobile Holdings Ltd.), исто така забележаа пад.
Ако во продажбата се вклучат и хибридите, БЈД продаде вкупно 822.094 единици и забележа уште еден рекорден квартал, што му помогна да ја зацврсти својата позиција како најпродавана марка на автомобили во Кина.
Број на испораки на „Тесла“ (сина линија) и број на целосно електрични возила продадени од БЈД (бела линија)
Bloomberg
Познат по продажбата на достапни автомобили, БЈД успеа да стане поатрактивен за поширокиот пазар, што доведе до раст на продажбата. Компанијата додаде два луксузни електрични модела, „јангванг“ (Yangwang) и „фенг ченг бао“ (Fang Cheng Bao), за да навлезе во ценовната категорија од милион јуани (137.000 долари). Овие цени се речиси двојно повисоки од тие на претходните модели од високата класа. Исто така работеа и на промоција на два поевтини модела, „сигал“ (Seagull) и „долфин“ (Dolphin), за да бидат конкурентни и во таа категорија.
Растот на извозот ѝ помогна на компанијата, која вообичаено произведува сопствени батерии и чипови, а БЈД планира да ја зголеми продажбата во странство за да ја комплетира својата доминација.
Извозот учествуваше со девет проценти од продажбата на БЈД во третиот квартал, што е зголемување од пет проценти од претходниот квартал, според аналитичарката на „Блумберг интелиџенс“, Џоан Чен.
Bloomberg
„Ова ќе биде клучен двигател за обемот на продажба следната година бидејќи БЈД го проширува своето глобално присуство со повеќе нови електрични возила“, рече таа.
И БЈД и „Тесла“, сепак, се под лупа од европските регулатори што започнаа истрага за кинеските субвенции за електрични возила, за кои тие тврдат дека ги ставаат европските производители на автомобили во неповолна положба.
Испораките на „Тесла“ потфрлија за околу 20.000 возила во однос на проекциите на аналитичарите, бидејќи компанијата ги подготвува своите фабрики да започне со производство на новиот „модел 3“ (Model 3) и „сајбертрак“ (Cybertruck) - кој допрва треба да започне со производство. Сепак, компанијата на Илон Маск повтори дека нејзината годишна цел е да продаде 1,8 милион возила. БЈД е на пат да продаде околу три милиони возила, вклучувајќи и хибриди.
„Тесла“ сега го продава својот основен „модел ј“ (Мodel Y) со погон на задните тркала по пониска цена на американскиот пазар. На истиот модел направи и некои измени во Кина, но цената таму остана иста.
