Компанијата „Пакет.мк“ (Paket.mk) обезбеди инвестиција од 300.000 евра, предводена од „Илевн венчрс“ (Eleven Ventures), еден од водечките инвестициски фондови во Југоисточна Европа. Овој фонд е познат по инвестициите во брзорастечки компании како „Пејхок“ (Payhawk), „Гтмхаб“ (Gtmhub) и „Дронамикс“ (Dronamics). Од компанијата велат дека ова партнерство го потврдува цврстото позиционирање на „Пакет.мк“ како прв избор за пазарење на најдинамичниот сегмент на потрошувачи во Скопје.
Од своето основање пред неколку години, па до денес, „Пакет мк“ секако значително влијаеше на е-трговијата во Македонија.
„Соработката со ’Илевн венчрс’ (Eleven Ventures) не е само признание за нашите досегашни достигнувања туку е и поддршка на нашата стратегија што се базира на спојот на пионерска технологија, нашата посветеност кон иновациите насочени кон корисниците и нашите амбиции да ја редефинираме е-трговијата во регионот“, изјави Драган Јосифовски, коосновач на „Пакет мк“.
Онлајн супермаркет-секторот доживеа значителен раст за време на пандемијата на ковид. Сепак, на територијата на Западен Балкан сé уште не е воспоставен јасен пазарен лидер. Иако многу традиционални малопродавачи и апликации за брза достава се обидуваат да воспостават онлајн присуство, најчесто потфрлаат во ефикасноста и понудата. Од „Пакет мк“ велат дека, за разлика од тоа, тие обезбедуваат ефикасен и разновиден асортиман на производи што го диференцира во однос на конкуренцијата.
„’Илевн’ е совршен партнер во нашата мисија за унапредување на е-трговијата во Северна Македонија. Настрана од капиталот, тие носат непроценливо богатство од искуство во секторот и огромна мрежа на експертиза“, вели Душко Јордановски, коосновач.
Пакет.мк
Ивајло Симов, партнер во „Илевн венчрс“ (Eleven Ventures), вели дека тимот на „Пакет.мк“ ги импресионирал со својата енергија и трудољубивост. „Тие работат на бизнис-модел за кој веруваме дека има потенцијал да се прошири во регионот, а Драган и Душко се вистинските луѓе да го сторат тоа“, вели Симов.
„Пакет.мк“ доставува широка палета производи - од големи брендови до уникатни органски производи со локално потекло. Тие велат дека посветеноста на разновидната и висококвалитетна понуда ја зацврстила нивната доминација дури и во услови на интензивна конкуренција од поголемите трговски синџири присутни на онлајн пазарот.
Пристапот на „Пакет мк“ (Paket.mk) за онлајн купување се базира на користењето напредна технологија и ефикасни процеси. Таа стратегија им донесе забележителен раст од 400 проценти за време на периодот на пандемијата на ковид. Дури и во периодот по пандемијата, платформата ја продолжи својата нагорна траекторија, покажувајќи ги својата издржливост и приспособливост на динамичните пазарни услови. Постојаните позитивни реакции од страна на корисниците дополнително ја потврдуваат нивната ефикасност и го позиционираат „Пакет.мк“ како водечка онлајн платформа за намирници.
Партнерството со „Илевн венчрс“ (Eleven Ventures) не се однесува само на финансиски инвестиции. Тие велат дека тоа е одраз на вербата во визијата на македонската компанија, нивниот врвен квалитет на услуги и нивната амбиција да се прошири и освои пазари низ поширокиот балкански регион.
Основачите велат дека со оваа стратегиска инвестиција компанијата значително ќе го подобри својот асортиман на производи, трансформирајќи ја платформата во единствена дестинација за неделно пазарење. Фокусот ќе биде ставен на воспоставување партнерства со нови доставувачи, обезбедувајќи понуда што ги надминува очекувањата поставени од големите синџири на супермаркети.
.webp){kind=icon}
