Инвестициите во откуп на побарувања од корпоративниот сектор на „ЕОС Матрикс“ се зголемија повеќе од двојно споредено со претходниот период. Само во последната година компанијата инвестираше околу еден милион евра во побарувања од ваков тип.
„Пандемијата, енергетската криза и растот на инфлацијата го отежнаа работењето на компаниите. Многу од нив тешко ги сервисираат достасаните долгови кон банките. Тоа е причината поради која се зголемени инвестициите во побарувања во корпоративниот сектор“, вели генерална директорка на „ЕОС Матрикс Македонија“, д-р Катерина Бошевска.
„Инвестирањето во откуп на побарувања во корпоративниот сектор даде многу позитивен ефект, бидејќи понуди решение за компаниите со проблеми на пазарот во период на заострување на условите за кредитирање, а што се случува истовремено со намалените и ограничени деловни активности. Во вакви околности, важноста на неконвенционалните инструменти за финансирање е од витално значење, бидејќи овозможува корпоративниот сектор брзо да се регенерира и да ја зајакне својата кондиција и успешно да ги продолжи своите активности на пазарот“, истакна Бошевска.
„ЕОС Матрикс Македонија“ е дел од „ЕОС груп“, групација што работи на повеќе пазари, чие вкупно инвестициско портфолио на побарувања изнесува 1,2 милијарда евра. Како дел од оваа групација, „ЕОС Матрикс Македонија“ работи со иновативни технолошки решенија што нудат нови можности на финансискиот пазар, подобрувајќи ја можноста за развој на корпоративниот сектор и за зголемување на неговата конкурентност. Преку своите активности компанијата придонесува и за забрзување на процесот на наоѓање системско решение за решавање на корпоративната инсолвентност во согласност со последните препораки на Европската Унија во оваа област, која предвидува креирање решенија што ќе овозможат реорганизација и рестартирање, наместо стечај или ликвидација на компаниите.
Според достапните податоци, корпоративниот сектор учествува со околу две третини во формирањето на БДП на земјава, а вработува околу три четвртини од вкупно вработените лица, со што овој сегмент е главен столб на вкупните економски активности.
.webp){kind=icon}