X, социјалната мрежа порано позната како Твитер, започна со тестирање претплата од 1 долар годишно за нови налози што сакаат да објавуваат или да комуницираат со други корисници. Мерката има потенцијал да ги намали спамот, автоматизираните ботови и манипулацијата со услугите.
Тестот, наречен „Не сум бот“ (Not a Bot), е спроведен во Нов Зеланд и на Филипините, објави X во блогпост во вторникот. Новите корисници што не ја плаќаат таксата нема да можат да преземаат одредени активности на страницата, вклучувајќи и пишување објави, лајкување, одговарање или обележување.
„Ова ќе ја процени потенцијално моќната мерка, која ќе ни помогне да се бориме против ботовите и спамерите на X, а истовремено ќе ја балансира пристапноста на платформата со мала сума како надомест“, се наведува во објавата. „Во рамките на овој тест, постојните корисници не се засегнати“.
Компанијата со седиште во Сан Франциско е во потрага по нови извори на приходи по хаотичното преземање од страна на милијардерот Илон Маск минатата година, што ја оптовари со долг од 13 милијарди долари и ги протера огласувачите загрижени поради олабавувањето на правилата за безбедноста на содржините. X должи околу 1,2 милијарда долари за камати годишно, за долгот поврзан со стекнување, процени претходно „Блумберг“.
„За да го закрепне растот, X планира да тестира три нивоа на својата премиум-услуга и да лансира дополнителни функции што би можеле да генерираат приходи, како што се шопинг и плаќања“, изјави извршната директорка Линда Јакарино во текот на месецов. Премиум-планот на X, кој моментално чини 7,99 долари месечно, ќе биде поделен на нивоа што ќе ѝ дозволат на компанијата да им наплаќа на клиентите различни износи во зависност од тоа колку реклами се прикажани.
Новите корисници на X на двата пазара ќе мора да се претплатат или на програмата „Не сум бот“ или на нивото X премиум, познато по тоа што им дава на клиентите сини ознаки за верификација, со цел да пишуваат и да комуницираат на објавите. Од социјалната мрежи претходно ги наведоа Филипините како жешка точка за лажни сметки.
„Читајте бесплатно, но со 1 долар годишно за пишување“, напиша Маск на X по објавата. „Тоа е единствениот начин да се борите со ботовите без да ги блокирате вистинските корисници“.
.webp){kind=icon}
