Раст на продажбата на „Атлантик“ за 15 отсто, Македонија лидер во дистрибуцијата

„Атлантик група“ во првите девет месеци од годинава оствари раст на приходите од продажба за 15,5 отсто во однос на истиот период лани и достигна сума од 721,6 милиони евра, објави во вторникот компанијата.

Годишната оперативна добивка порасна за 3,5 отсто, на 73,1 милиони евра, а нето-добивката за 1,7 отсто, на 36,5 милиони евра.

„Во сè уште нестабилно и предизвикувачко опкружување, ’Атлантик група’ постигна силен раст на продажбата во сите сегменти и на сите важни пазари. Растот е особено забележлив во областите ’слатко-солено’, како и во пијалаците, кои освен вредносно, постигнаа значително зголемување и на обемот на продажбата, но се посочува дека обемот на продажба и на другите деловни сегменти е стабилен, што е потврда за нашата стратегија и квалитетот на нашите брендови. Одличните продажни резултати се остварени и покрај сè уште високите трошоци за суровини и материјали за пакување, логистика и други услуги, енергија, како и значителното зголемување на платите, што овозможи раст на профитабилноста. Благодарен сум им на нашите вработени, клиенти, доставувачи и партнери за нивната посветеност и желба да го прават нашиот бизнис посилен заедно секој ден“, изјави Емил Тедески, претседател на Управниот одбор, по повод објавувањето на деветмесечните резултати.

Како што се наведува во соопштението, најголем раст на приходите од продажба има деловното поле на слатко-солено, поточно 30,7 отсто, а потоа следува сегментот на пијалаците со носечкиот бренд „Цедевита“, каде што растот е 19,4 отсто. Овде е и брендот „Донат“, со раст од 12,1 отсто.

„Во дистрибуцијата, лидери се Македонија со раст од 19,9 отсто, Хрватска со раст од 19 отсто и Србија со раст од 16,5 отсто. Во вкупната продажба на ’Атлантик група’ сопствените брендови учествуваат со 62,5 отсто, бизнисот со фармација со 8,9 отсто, додека главните брендови учествуваат со 28,6 отсто од приходите од продажба. Кафето се издвојува како најголема поединечна категорија со 145,4 милиони евра, односно учество од 20,1 отсто во вкупните приходи од продажба“, се посочува во соопштението на компанијата.

Првите девет месеци од оваа година беа обележани и со други значајни настани за компанијата, како што е започнувањето на производството на зелена енергија во рамките на групацијата, како и изградбата на нов логистичко-дистрибутивен центар во Скопје.

„Во првите девет месеци од 2023 година ’Атлантик група’ успешно започна со работа на две соларни централи на своите локации, централниот логистички дистрибутивен центар во Загреб и на производствената локација во Рогашка Слатина. Во мај ’Атлантик’ поднесе обврзувачка понуда за купување на компанијата ’Штраус Адријатик’, а склучувањето на трансакцијата е предмет на претходно одобрување на комисијата за заштита на конкуренцијата во Србија. Во делот на дистрибуцијата, претходно беше договорена соработка со групацијата ’Подравка’, во која е вклучена и ’Атлантик’. Дополнително, значаен чекор напред во развојот на бизнисот има преку соработка со новата главна компанија „Халеон“ („Сенсодајн“, „Корига“, „Пародонтакс“, „Аквафреш“), додека во Скопје долгорочен развој се гарантира со склучување инвестиција вредна 12 милиони евра во новоотворениот логистичко-дистрибутивен центар“, велат од „Атлантик група“.

Во моментов нема коментари за веста. Биди прв да коментира...

Остави коментар