„Дојче банк“ (Deutsche Bank) планира да ја забрза исплатата на дивиденди бидејќи растот на приходите на банката во сегментот на работење со корпоративни клиенти, како и приливот на депозити, ги надминаа послабите резултати во текот на третиот квартал.
Приходите во третиот квартал се за околу три отсто повисоки од истиот период лани и пораснале на 7,13 милијарди евра. Тоа е во согласност со процените на аналитичарите. По овој резултат, „Дојче банк“ објави дека очекува околу 29 милијарди евра приход за цела година, со што се допира горната граница на опсегот на претходните прогнози.
Во европскиот банкарски гигант гледаат и можност за ослободување дополнителни три милијарди евра капитал, откако ќе ја подобрат распределбата на средствата, а регулаторните ефекти се покажаа како помалку сериозни од она што се очекуваше претходно.
„Значително ја подобривме перспективата за нашиот капитал“, се наведува во соопштението на главниот извршен директор Кристијан Севинг. „Тоа ни дава простор да инвестираме во растот на нашиот модел Глобал хаусбанк, дополнително да ги подобриме приносите и да ги зголемиме и забрзаме исплатите на акционерите“.
Севинг вети дека ќе ги зголеми приходите додека ги држи трошоците под контрола, со цел да го исполни ветувањето дека ќе им врати осум милијарди евра на акционерите во текот на пет години. Додека зголемувањето на каматните стапки помогна да се неутрализира забавувањето на тргувањето во минатиот квартал, високата инфлација, инвестициите за да се поправат слабите контроли и проблемите со ИТ-проектот во малопродажниот сектор на банката ја комплицираат ситуацијата.
Некогаш движечката сила зад „Дојче банк“, нејзиниот оддел за тргување со фиксни приходи забележа пад на приходите за 12 отсто во третиот квартал, додека нејзините конкуренти од САД забележаа раст од 1,1 отсто во истиот период. Но, сепак, тоа е многу подобро од минусот од 26 проценти што го имаше „Барклис“ (Barclays).
Иако приходите од консалтинг, како и од продажба на обврзници и акции се тројно зголемени, тоа не беше доволно да се надоместат слабостите во инвестициското банкарство, бидејќи советодавниот сегмент од деловното работење на оваа банка е релативно скромен. Сепак, на почетокот на месецов „Дојче банк“ го заклучи преземањето на британскиот брокер „Нумис“, токму за да го прошири тој деловен сегмент.
Во меѓувреме Севинг сака да ги зголеми приходите од провизии за да го надомести очекуваното забавување на приходите од камати бидејќи повеќето централни банки се чини дека се при крај со брзото зголемување на каматните стапки, што им овозможи на банките да наплатуваат повисоки камати на заемите додека ги одржуваат каматните стапки на депозитите релативно ниски. „Дојче банк“ посочи дека овој период би можел да заврши бидејќи конкуренцијата за депозити се стеснува, што предизвикува намалување на маржите.
Корпоративното банкарство, кое го надомести забавувањето на тргувањето годинава, имаше раст на приходите од 21 отсто, додека банкарството на мало имаше поскромен раст од околу три отсто.
.webp){kind=icon}
