.webp){kind=icon}
Maкедонските компании во изминатите години се соочија со предизвици при наоѓањето нови извозни партнери. Проблем беше и проширувањето на деловните активности надвор од границите на земјата и регионот, вели Антје Ванделт, директорка на Македонско-германското стопанско здружение (АХК), на настанот што го организираше АХК - SUBEX - Suppliers Balkan Expo.
Блумберг Адрија
„Најновите случувања во Европа и во светот доведоа до сериозни нарушувања во стопанството, кое секојдневно се соочува со предизвици како последица на војната во Украина, која сериозно го наруши европскиот синџир на снабдување, но и екстремно ги зголеми цените на енергијата и енергентите“, рече Ванделт.
Според неа, во потрагата по стабилни компании доставувачи, но и пазари за инвестирање каде што европските компании може да ги префрлат своите производствени капацитети, Балканот е фокус, а интересот за земјава е голем, за што говорат и бројките.
Блумберг Адрија
„Извозот од Македонија во Германија е зголемен за повеќе од трипати во последните десет години и денес достигнува 4,8 милијарди евра. Во последните две години повеќето германски инвеститори што веќе работат во земјата енормно ги проширија своите производствени капацитети. Додека германските инвеститори претходно беа претежно од автомобилската индустрија, сега имаме сè поголема диверзификација. Новите германски инвеститори се од други сектори, како што е најсовремено производство на батерии, текстил, кабли и медицинска опрема“, вели Ванделт.
Блумберг Адрија
Министерот за економија Крешник Бектеши рече дека земјава ќе продолжи да прави напори за да им овозможи најдобри услови за работа на инвеститорите.
„Најважно од сè е компаниите што ќе решат да инвестираат во Македонија да имаат предвидлива бизнис-клима. Во насока на понатамошна поддршка на развојот на индустријата, диверзификација на производството и зголемување на извозот, Владата нуди поголем сет на мерки, како мерките од Законот за финансиска поддршка на инвестиции, мерки преку програмите на Министерството за економија за поддршка на преработувачка индустрија итн.“, рече Бектеши.
Во следниот период, како што најави Бектеши, Министерството ќе се фокусира на соработка меѓу бизнисот и науката за поддршка на истражувања и иновации.
