.webp){kind=icon}
Казахстан го започна процесот на преземање на локалниот бизнис на „Арцелор Митал“ (ArcelorMittal SA) откако десетици загинаа во пожар во рудникот на компанијата.
Претседателот на Казахстан Касим-Жомарт Токаев и нареди на Владата да ја прекине инвестициската соработка со „Арцелор Митал Темиртау“ по денешната несреќа во рудникот Костенко во близина на градот Караганда. Владата соопшти дека постигнала прелиминарен договор со акционерите на „Арцелор Митал“ и ја подготвува трансакцијата за пренос на сопственоста на претпријатието во корист на Република Казахстан.
До сега, на површината беа изнесени 208 од 252 рудари,23 рудари се уште се во рудникот, а пронајдени се телата на 21 рудар, соопшти компанијата.
Вториот по големина производител на челик во светот неколку пати претходно беше под притисок во Казахстан поради безбедноста на неговите капацитети. Во август во пожар во рудникот загинаа пет работници. Во ноември 2022 година, уште пет работници загинаа во експлозија на гас во еден од нејзините рудници.
Компанијата ги стекна своите казахстански операции во 1990-тите и вети дополнителни инвестиции за модернизација. Во моментов поседува рудници за железо, рудници за јаглен и фабрика за челик во земјата.
