Колкава е добивката на „ЕВН хоме“, чии приходи достигнаа 500 милиони евра

Вкупните приходи на една од најголемите енергетски компании во Македонија - „ЕВН хоме“ лани достигнаа 30,7 милијарди денари (околу 500,5 милиони евра), што е значително зголемување од 49,1 проценти во однос на претходната година, кога вкупните приходи на компанијата изнесувале 20,6 милијарди денари (околу 335,7 милиони евра), покажуваат податоците од годишните сметки на „ЕВН хоме“.

„ЕВН хоме“ е друштво за обезбедување универзална услуга за снабдување со струја. Според податоците од финансиските извештаи на компанијата, и покрај континуираното зголемување на приходите во периодот 2020-2022 година, „ЕВН хоме“ лани првпат остварила добивка од 8,9 милиони евра откако претходно во 2020 и во 2021 година забележала загуби во работењето. 

Компанијата лани имала вкупни расходи од околу 30 милијарди денари (488,3 милиони евра), што е зголемување од 45,7 проценти во однос на претходната година. кога тие изнесувале 20,6 милијарди денари (335,1 милиони евра). Најголем дел од вкупните расходи отпаѓа на расходите од основна дејност. кои лани се зголемиле за 38,6 проценти во однос на претходната година, а зголемување има и кај другите трошоци (11,2 проценти), кај трошоците за вработени (5,3 проценти), трошоците за амортизација (137,5 проценти) и резервирања за трошоци и ризици (193,6 проценти).

Кога станува збор за расходите, најзначително зголемување во 2022 година во однос на 2021 година има кај ставката други расходи од работењето, кои лани изнесувале 701,6 милион денари (11,4 милиони евра), а во претходната година тие биле само 1,4 милион денари (23.335 евра). Станува збор за пораст од 48.788 проценти.