Пад на приходите и добивката на „Комерцијална банка“ во првата половина од 2026

„Комерцијална банка“ АД Скопје во првата половина од годинава оствари неконсолидирана добивка од 2,79 милиjaрди денари (45,4 милиони евра), што е намалување од 5,5 проценти во однос остварената добивка од 2,96 милијарди денари (48,1 милиони евра) во истиот период минатата година. Вкупните приходи од работењето изнесуваат 4,33 милијарди денари (70,5 милиони евра) и бележат намалување од 3,3 проценти во однос на истиот период минатата година кога банката имаше приходи од 4,48 милијарди денари (72,9 милиони евра). Анализата покажува дека банката бележи намалување на профитабилноста со оглед на тоа што нето профитната маржа бележи пад од 66 проценти во првата половина на минатата година на 64,4 проценти во првото полугодие од годинава.  

„И покрај ваквото намалување, сепак планираната бруто-добивка за првото полугодие од годинава е остварена со 110,9 проценти. Позитивниот финансиски резултат е остварен во услови на зголемени ризици од надворешното окружување и продолжена неизвесност на глобалните пазари. Новиот воен конфликт на Блискиот Исток и натамошните геополитички тензии предизвикаа нарушувања во снабдувањето со нафта и гас, раст на цените и влошени економски изгледи на глобално ниво“, наведуваат од банката во образложението на неконсолидираните финансиски резултати.

Оттаму додаваат дека во рамки на домашната економија, овие фактори се одразуваат преку зголемени инфлаторни притисоци и очекувања за намален економски раст, и покрај стабилната побарувачка и поддршката од јавните инвестиции. Од банката укажуваат дека поради присутните економски последици од геополитичките случувања, неизвесноста околу темпото на целосна стабилизација и притисоците врз инфлацијата, како и зголемените каматни стапки од страна на ЕЦБ, во текот на јуни НБРСМ изврши умерено затегнување на монетарната политика што резултираше со зголемување на основната каматна стапка за 0,25 п.п. до нивото од 4,25  проценти.

„Остварената добивка пред исправка на вредност, која претставува показател за оперативната способност на банката да ги покрива расходите од работењето, е за 6,1 проценти пониска во однос на истиот период минатата година. Намалувањето на добивката пред исправка на вредност главно произлегува намалените останати приходи од дејноста, како и помал износ на реализирани нето позитивни курсни разлики“, посочуваат од банката.

Очекувања

Од „Комерцијална банка“ додаваат дека макроекономските услови во кои банката ќе ја остварува својата активност во текот на 2026 година се условени од сѐ уште неизвесниот и непредвидлив глобален амбиент, негативните ефекти кон стапката на раст и очекуваните инфлаторни притисоци како резултат на воениот конфликт на Блискиот Исток.

„Притисоците и неизвесностите во рамки на глобалната економија упатуваат на потребата од внимателен пристап во обликувањето на очекувањата за остатокот од 2026 година, при што се земени предвид проекциите објавени од Министерството за финансии, Народната банка на Република С Македонија, ММФ и Светската банка“, наведуваат од банката. 

 

Оттаму посочуваат дека очекувањата за стапката на раст на БДП според меѓународните финансиски институции се дека таа ќе изнесува околу 3 проценти за 2026 година, додека од страна на Министерството за финансии и Народната банка се пооптимистички и согласно последните проекции се проектирани на 3,5 проценти.

„Во однос на структурата на растот, се очекува главен двигател да остане домашната побарувачка, односно растот на бруто инвестициите и домашната потрошувачка, поддржани од порастот на кредитирањето“, велат од банката.

Од „Комерцијална банка“ посочуваат дека се очекува во текот на 2026 година банкарскиот систем да продолжи да обезбедува кредитна поддршка во услови на заострени регулаторни барања (зголемување на противцикличниот заштитен слој на капиталот, заострени макропрудентни показатели, зголемени обврски и стапки на задолжителната резерва во денари и во девизи, подготовки за исполнување на минималната стапка на сопствени средства и минимални обврски и нова оперативна рамка на монетарната политика).

Од банката информираат дека во јуни 2026 година кредитната активност порасна за 13,1 проценти на годишно ниво, при што кредитирањето на домаќинствата се зголеми за 12,1 проценти, а кредитирањето на нефинансиските друштва за 14,2 проценти. Истовремено , вкупните депозити беа повисоки за 9,9 проценти на годишно ниво, одразувајќи раст кај депозитите на домаќинствата од 10,5 проценти и кај корпоративните депозити од 8 проценти.

„За периодот 2026-2028 година проекциите на кредитниот раст се предвидени со релативно помала динамика, или 7,3 проценти, во просек, додека растот на вкупните депозити е проектиран со просек од околу 7,6 проценти годишно“, наведуваат од банката.