„Реплек“ одржа висока профитабилност во првата половина од 2026

„Реплек“ во првата половина од годинава оствари консолидирана нето добивка од 108 милиони денари (1,7 милиони евра), што е благо намалување во однос на истиот период минатата година кога добивката изнесуваше 130 милиони денари (2,1 милиони евра. Компанијата во првите шест месеци од годинава оствари вкупни консолидирани оперативни приходи од 875 милиони денари (14,2 милиони евра), што е пад во однос 1.04 милијарда денари (16,9 милиони евра) релизирани во првото полугодие од 2025 година. Нето профитната маржа на компанијата изнесува 12,4 проценти, што е на речиси исто ниво како и во истиот период минатата година кога изнесуваше 12,5 проценти.

   

 

Матеј Вујаниќ, аналитичар за макроекономија и пазари на капитал во тимот на „Блумберг Адрија“ вели дека „Реплек“ објави резултати кои беа мешани, но со добар квалитет од оперативна страна.

„Иако послабата продажба на извозните пазари изврши притисок врз вкупните приходи, компанијата одржа висока профитабилност благодарение на силниот раст на домашниот пазар, подобрата структура на продажба, строгата контрола на трошоците и поголемата оперативна ефикасност. Во исто време, континуираните инвестиции во производствениот капацитет и дигитализацијата треба да го поддржат идниот раст на бизнисот“, наведува Вујаниќ.

Тој укажува дека во однос на мултипликаторите, „Реплек“ се тргува со значително пониски вреднувања од споредливите конкуренти.

„Делумно, тој попуст може да се припише на помалата пазарна капитализација и послабата ликвидност на акцијата“, вели Вујаниќ.

Очекувања

Од „Реплек“ во образложението на финансиските резултати соопштија дека компанијата влегува во втората половина од 2026 година со зајакната позиција на домашниот пазар, подобрена ефикасност во работењето и инвестициски циклус кој се приближува кон својата завршна фаза.

„Со завршувањето на тековните капитални инвестиции, друштвото создава основа за понатамошен раст и подобрување на оперативните перформанси“, наведуваат од „Реплек“.

 

Раководството очекува постепено подобрување на извозната реализација во текот на второто полугодие, поддржано од нормализирањето на побарувачката на дел од клучните извозни пазари, ставањето во функција на новите производствени капацитети и понатамошното проширување на присуството на високо регулираните пазари, вклучувајќи го и започнувањето на извозот во Обединетото Кралство.

„Истовремено, се очекува домашниот пазар да го задржи позитивниот тренд и да продолжи да придонесува кон стабилните консолидирани резултати на групацијата“, велат од „Реплек“.