.webp){kind=icon}
„Меркатор“ потпиша договор за преземање на 100 отсто од уделот во словенечката компанија „Енгротуш“, која управува со трговскиот синџир „Туш“, соопштија во средата од „Фортенова груп“, сопственик на „Меркатор“. Станува збор за еден од најголемите продажни синџири во Словенија, а со потпишувањето на договорот започна и постапката за добивање одобрение од словенечката агенција за заштита на конкуренцијата.
Во соопштението се наведува дека спојувањето на „Меркатор“ и „Енгротуш“ ќе ја зајакне пазарната позиција на двете компании „и ќе донесе нови можности за развој на словенечките добавувачи и вработени“. Потписниците на договорот се убедени дека „интеграцијата на двете компании претставува одлична основа за идниот раст на заедничката компанија“, се вели во соопштението на „Фортенова“.
На веб-страницата на „Туш“ се наведува дека синџирот вработува околу 2.600 работници и има 260 деловни единици во различни форми, но трансакцијата не ги вклучува аптеките „Туш“, кои ќе бидат одделени во посебна компанија. Сегашни сопственици на „Енгротуш“ се компанијата „Туш холдинг“ и фондот „АХ Инвест 1“. Словенечките медиуми наведуваат дека вредноста на трансакцијата е 30 милиони евра, но во соопштението на „Фортенова“ не се споменува сума.
Медиумите на почетокот на октомври објавија дека „Меркатор“ и германскиот РЕВЕ (REWE) влегле во последниот круг од изборот за нов сопственик на „Туш“. Андраж Туш во име на продавачот изјави „по неколкумесечни преговори се одлучивме (...) за купувач кој, според нас, е најдобриот избор за вработените, деловните партнери и развојот на основната дејност на компанијата“. Словенечките медиуми јавуваат дека „Меркатор“ понудил повисока цена за „Туш“ и со тоа ја истиснал РЕВЕ.
Томислав Крамариќ, претседател на управниот одбор на „Меркатор“, истакна дека со оваа трансакција „продолжува консолидацијата на сопственоста во трговскиот сектор“ и додаде дека спојувањето со „Енгротуш“ „ќе помогне да се постигнат деловните цели“. Фабрис Перушко, главен извршен директор на групацијата „Фортенова“, во соопштение посочи дека со преземањето се потврдува „статусот на најсилен домашен малопродажен синџир во регионот“. Тој потсети дека ова е второ големо проширување на групацијата „Фортенова“ за кратко време, по преземањето на пазарот во Црна Гора.
„Меркатор“ држи околу една четвртина од словенечкиот малопродажен пазар, „Туш“ има уште една десетина, така што не е невозможно регулаторите да го условат склучувањето на преземањето со продажба на дел од малопродажниот синџир, особено ако има сериозно нарушување на пазарна конкуренција на некои локации.
И „Меркатор“ и „Туш“ остварија загуба во работењето во Словенија минатата година, пишуваат словенечките медиуми, па се шпекулира дека спојувањето и искористувањето на синергијата, односно економијата на обем, може да резултира со помали трошоци и попрофитабилно работење.
„Фортенова“ додаде дека додека не заврши процесот за добивање одобрение од агенцијата за конкуренција, не можат „да ги коментираат деталите од договорот или плановите за натамошен развој на поврзаната компанија“.
