.webp){kind=icon}
Клиентите на компанијата „Блекрок“ (BlackRock Inc.) се собраа во долгорочни фондови во последниот квартал, додавајќи 63 милијарди долари во портфолијата на фондовите со кои се тргува на берза (ЕТФ) и другите производи. Ова може да биде знак дека инвеститорите планираат да ги „ангажираат“ своите пари бидејќи пазарите на акции и обврзници почнуваат да растат.
Подобрата состојба на пазарите и приливите на капитал ги зголемија средствата со кои управува „Блекрок“ на повеќе од 10 трилиони долари во претходните три месеци, соопшти најголемиот менаџер на средства во светот. Тоа ги надмина прогнозите на аналитичарите анкетирани од „Блумберг“, кои предвидоа дека т.н. индикатор АУМ (англ. Assets under management - средства под управување) ќе се зголеми на 9,8 трилиони долари. Сепак, и покрај тоа, АУМ остана малку под рекордот поставен пред две години.
„'Блекрок' обезбеди диференциран органски раст и оперативна маржа во годините што беа многу предизвикувачки за нашата индустрија“, наведе извршниот директор Лери Финк во изјава. „Кога инвеститорите беа подготвени да ги вложат своите пари, тоа го направија со 'Блекрок'“, додаде тој.
Клиентите исто така внесоа нови 33 милијарди долари во одделните подружници на фирмата за управување со пари и фондови, покажувајќи дека компанијата успеала да се позиционира како место каде што може да се обратите без оглед на вашите инвестициски афинитети. Портфолиото на ЕТФ фондови забележа прилив од 88 милијарди долари, а фондовите за обврзници пораснаа за 32 милијарди долари.
Приспособениот нето-приход на компанијата се зголеми за 7 отсто, на 1,5 милијарда долари, или 9,66 долари по акција, надминувајќи ги очекувањата на аналитичарите од 8,88 долари по акција. Приходите исто така се зголемија за седум отсто, на 4,6 милијарди долари.
Клиентите на „Блекрок“ повлекоа 13 милијарди долари од долгорочни фондови во третиот квартал. Во последните три месеци од 2023 година, акциите и обврзниците напредуваа бидејќи пазарите станаа уверени дека Федералните резерви во САД (Фед) ќе престанат да ги зголемуваат каматните стапки и дека следната година ќе следува пресврт во монетарната политика.
