Комисијата за заштита на конкуренцијата (КЗК) примила известување за концентрација со која друштвото за телекомуникациски услуги „Телекабел“ ДООЕЛ Штип ќе стекне контрола над трговското радиодифузно друштво – оператор на пренос на мрежа „Инфел – КТВ“ Охрид.
„Телекабел“ е оператор на јавна комуникациска мрежа и давател на јавни комуникациски услуги кој е нотифициран и активен учесник на пазарот за електронски комуникации на територијата на Македонија. Основан е во 1998 година и на своите претплатници им ги нуди следните комуникациски услуги: пристап до телевизииски содржини, интернет, фиксна телефонија и мобилна телефонија.
„Инфел – КТВ“ е оператор на јавна комуникациска мрежа и давател на јавни комуникациски услуги кој е нотифициран и активен учесник на пазарот за електронски комуникации на територијата на општина Охрид. Основан е во 2001 година и на своите претплатници им ги нуди следните комуникациски услуги: пристап до телевизииски содржини и интернет.
Од КЗК информираат дека основачите на „Инфел – КТВ“ со договор за пренос на удел ќе му ги пренесат во целост своите удели на „Телекабел“, со што „Телекабел“ ќе се стекне со 100 процентен удел во „Инфел – КТВ“ и ќе стане целосна контрола над компанијата.
„Врз основа на прелиминарното испитување Комисијата утврди дека предметната концентрација може да потпадне под одредбите на Законот за заштита на конкуренцијата. Сепак конечната одлука по ова прашање е резервирана. Комисијата ги повикува заинтересираните трети страни да достават забелешки и мислења за оваа концентрација до Комисијата.“, соопшти КЗК.
.webp){kind=icon}
