.webp){kind=icon}
Компанијата „Пепсико“ (PepsiCo Inc.) забележа раст на продажбата повисок од очекуваниот благодарение на силната побарувачка на меѓународните пазари, додека обемот на продажба во САД се намали.
Компанијата (која, покрај брендот „Пепси“, ги поседува и брендовите „Маунтајн дев“ и „Фрито-Леј“) соопшти дека нето-приходот во првиот квартал пораснал за 2,7 отсто, надминувајќи ја просечната процена на аналитичарите од 2,3 отсто.
Продажбата на меѓународните операции на „Пепси“, кои сочинуваа речиси 40 отсто од вкупниот нето-приход минатата година, порасна за девет отсто. Уделите од пазарите во развој како Мексико, Бразил и Кина забележаа двоцифрен раст на органскиот приход, како и Австралија, додека продажбата во Британија се зголеми едноцифрено.
По периодот на највисока инфлација во последните четири децении, производителите на стоки за широка потрошувачка претрпеа пад на обемот на продажба бидејќи купувачите, особено во САД, се префрлија на брендови од супермаркети. Северноамериканскиот оддел за храна и пијалаци на „Пепси“ продаваше помалку стоки во споредба со една година порано. Продажбата на безалкохолни пијалаци падна за пет отсто.
Приходите на брендот „Квекер фуд“, кој произведува овесни снегулки, паднаа за 24 отсто откако компанијата повлече повеќе житарки, бонбони и грицки од пазарот поради ризик од салмонела. Оттаму соопштија дека го рестартирале (ограниченото) производство на некои од отповиканите производи.
Компанијата не ги промени своите проекции за органски раст на продажбата за 2024 година од најмалку четири проценти, а северноамериканскиот бизнис продолжува да заостанува зад остатокот од компанијата.
