.webp){kind=icon}
„Витаминка“ е една од најстарите компании во земјава, постои од 1956 година и влегува во групата најголеми извозници. Компанијата е пример за успешна бизнис-приказна. Во 1974 година во погонот во Прилеп се произведуваше само еден производ, сега во асортиманот има над 400 артикли. Производствен погон сега има и во Косово, вели во интервју за ТВ „Блумберг Адрија“ главниот извршен директор на „Витаминка“, Сашо Наумоски.
Според него, тајната на успехот лежи во вистинската визија, инвестициите и познавањето на локалните пазари.
„Витаминка“ извезува во над 30 земји во Европа и светот, а 80 отсто од извозот завршува во земјите од регионот Адрија.
„Тоа е пазар што ние традиоционално добро го познаваме уште од времето кога живеевме во иста држава. Добро ги познаваме навиките на потрошувачите и лесно доаѓаме до нив, затоа сме присутни во речиси сите големи трговски синџири во регионот Адрија“, вели Наумоски.
Инвестициите на „Витаминка“ по краток застој за време на корона-кризата продолжуваат. Во моментов во тек се активности за нови погони за желе и кекс, но и голема инвестиција во енергетиката.
„’Витаминка’ влегува во голема инвестиција за производство на електрична енергија. Нашата цел е компанијата да ја направиме енергетски независна“, вели Наумоски.
Малку компании од земјава извезуваат поради повеќе причини. Проблемот е тоа што не инвестираат во саеми и маркетинг, но и во вработените. Сепак, Наумоски смета дека компаниите треба да добиваат поголема поддршка од Владата затоа што тие се тие што всушност го полнат буџетот за државата да исплаќа плати, пензии и социјални надоместоци.
„Ние немаме економска дипломатија. Да отидете во наша амбасада во светот, нема кому да му се обратите, од кого да побарате помош“, вели Наумоски.
Од пред четири години и фабриката за производство на масло за јадење „Брилијант“ работи во рамките на прилепската компанија.
