„Стопанска банка“ АД Скопје во првата половина од 2022 година оствари добивка по оданочување во износ од 1.465.381.000 денари (23,8 милиони евра), што е зголемување за 34 проценти во однос на истиот период минатата година.
Вкупната актива на банката на крајот на јуни 2022 година изнесува 115.585.072.000 денари и е поголема за 1 процент во однос на износот на активата на 31.12.2021 година.
„Нето-приходите од камати изнесуваат 1.990.215.000 денари и се зголемени за 5 проценти во однос на истиот период од минатата година, најмногу како резултат на зголемените кредитни активности и врз основа на тоа-зголеменото кредитно портфолио на банката. Нето-приходите од провизии и надоместоци изнесуваат 452.529.000 денари и се зголемени за 16 проценти во однос на анализираниот период во 2021 година. Ова е резултат на зголемен обем на активности односно зголемен обем на испорачани услуги на клиентите, од кои најмногу во делот на услугите во платниот промет и картичното работење“, соопшти банката преку Македонската берза.
Нето-приходите од курсни разлики забележаа пораст од 37 проценти и изнесуваат 83.828.000 денари, како резултат на зголемениот обем на тргувања на девизниот и менувачкиот пазар. Останатите приходи од дејноста забележаа зголемување од 119 проценти и изнесуваат 416.296.000 денари.
Пораст на кредитната активност
„Оперативните трошоци од работењето останаа на релативно исто ниво и покрај зголемувањето на цените на скоро сите позиции, при што трошоците за вработени изнесуваат 452.217.000 денари, додека оперативните трошоци изнесуваат 399.044.000 денари. Во анализираниот период, банката издвои исправка на вредност на финансиските средства и посебна резерва за вонбилансната изложеност, на нето-основа, во износ од 389.597.000 денари, која е намалена за 12 проценти во однос на истиот период од претходната година“, информираат од банката.
Паричните средства и паричните еквиваленти споредени со крајот на 2021 година се пониски за 3.406.566.000 денари, односно за 16 проценти, како резултат на порастот на кредитните активности на банката и употребата на ликвидноста за оваа намена.
„Дополнително, во текот на првото полугодие на 2022 година, граѓаните и компаниите интензивно ги користеа своите депозити во услови на зголемена инфлација и потреба за поголеми плаќања за енергија, набавка на потребни стоки, суровини и репроматеријали, итн. Кредитите на и побарувањата од други комитенти нето остварија пораст од 7 проценти споредено со крајот на минатата година и изнесуваат 83.146.636.000 денари. Кредитите на и побарувањата од банки изнесуваат 299.845.000 денари и бележат зголемување во однос на крајот на 2021 година за 8 проценти“, соопшти банката.
Вложувањата во хартии од вредност изнесуваат 11.966.962.000 денари и се намалени за 3 проценти во однос на крајот на минатата година, како резултат на зголемените кредитни активности и потреба за повлекување на овие средства за редовно работење. Останатите побарувања забележаа пораст од 3 проценти и изнесуваат 1.617.100.000 денари. Вкупните депозити на други комитенти изнесуваат 84.742.823.000 денари.
Очекувања за претстојниот период
Првата половина од 2022 година наметна сериозни долгорочни предизвици на глобално ниво кои особено негативно се рефлектираат врз европската економија, а со тоа и врз домашната економија, велат од банката.
„Високите цени на енергијата и нафтените деривати заедно со инфлаторните притисоци и пролонгираната Ковид пандемија воспоставуваат нова реалност во економското и севкупното живеење. Како и во секоја криза, економиите и бизнисите се соочени со предизвикот за соодветни прилагодувања од поширок опсег со цел да се обезбеди нивниот континуитет и да се надминуваат последиците од кризата“, соопшти банката.
Оттаму додаваат дека ќе продолжат со своите активности согласно деловниот план, истовремено водејќи грижа за зачувување на квалитетот на кредитното портфолио во услови на зголемени ризици во севкупната околина, поддршка на работењето на клиентите во сите сфери, како и целосно исполнување на сите регулаторни обврски.
„Грижата за стабилноста, ликвидноста, прудентното управување со ризиците и посветеноста на одржување на лидерската позиција во банкарскиот систем, останува во доменот на основните приоритети и во наредниот период. Во текот на анализираниот период банката доби дозвола за извршување на лизинг услуги со што ја прошири палетата на своите производи и услуги за компаниите и населението. И понатаму како приоритет остануваат новите дигитални и функционални можности за клиентите преку веќе воспоставената комуникациска инфраструктура. Грижата за општествената заедница и вработените исто така остануваат на преден план, со иста приоритетна важност како останатите спомнати таргети“, велат од Стопанска банка АД Скопје.
.webp){kind=icon}
