„Макпетрол“ ја зголеми добивката за два и пол пати

„Макпетрол“ АД Скопје во првата половина од 2022 година оствари добивка од 530.647.000 денари (8,6 милиони евра), што е зголемување за два и пол пати во однос на добивката од 209.497.000 (3,4 милиони евра) остварена во истиот период минатата година.  

Вкупиот приход на компанијата во првото полугодие од годинава изнесува 16,33 милијарди денари, кој е поголем од минатогодишниот за 7,43 милијарди денари, односно остварен е раст од 83,54 проценти. Во структурата на приходите, најголем удел со 98,60 проценти имаат приходите од продажба, од кои 93,41 проценти се остварени преку продажба на домашен пазар, а само 5,19 проценти се остварени преку продажба на странски пазар.

„Порастот на приходите, споредбено со минатата година, во најголем дел се должи на зголемените приходи на мало за 58,47 проценти, а истите учествуваат со 76,60 проценти во приходите од продажба. Трендот на пораст на приходите на мало во годината, се должи на: зголемување на прометот со нафтени деривати на мало за 8,20 проценти и зголемување на прометот на останатиот малопродажен асортиман (ДАС) за 40 проценти. Приходите на големо бележат раст од 277,43 проценти, што во најголем дел е резултат на растот на продажбата на природен гас од 11 проценти, како и продажбата на млазно гориво за 140,07 проценти. Продажбата, односно извозот на млазно гориво значајно се зголеми во текот на 2022 година, како резултат на олабавувањето на Ковид-рестрикциите за патувања“, информираат од компанијата преку Македонската берза.

Зголемени расходи

Вкупните расходи остварени во 2022 година се во висина од 15,74 милијарди денари што претставува зголемување во однос на минатата година за 7,07 милијарди денари или за 81,52 проценти.

„Порастот во најголем дел се должи на зголемените расходи за набавна вредност на трговски стоки од 90,15 проценти, поради драстичното зголемување на цените на светските берзи како резултат на енергетската криза. Набавната вредност го следи трендот на приходите од продажба, што е неминовно со оглед дека истата во апсолутен износ е дел од приходите од продажба, односно зафаќа околу 89 проценти од истите. Расходите за набавна вредност на трговски стоки, односно набавните цени, се расходи врз кои друштвото има лимитирано влијание. Истото се должи на регулирањето на најголем дел од набавните цени на нафтените деривати. Доколку набавната цена на одреден дериват не е регулирана, истата зависи од комплетно екстерни глобални фактори и движења, како што се цените на нафтените деривати на светските берзи и курсот на денарот во однос на доларот“, објаснуваат од компанијата.

Исполнување на планот и очекувања за претстојниот период

Во текот на првата половина од 2022 година, друштвото работеше во услови на економска криза, која се чувствуваше, како на локално, така и на глобално ниво, велат од „Макпетрол“.

„Економската криза започна со пандемијата на вирусот Ковид-19, а беше продлабочена како резултат на воениот конфликт помеѓу Русија и Украина, кој доведе и до зголемување на цените на енергенсите на светските берзи. Воениот конфликт, односно зголемувањето на цените, ја продлабочи енергетската криза, која кулминираше дури со скоро двојно зголемување на цените на дериватите споредено со минатата година. Наглото олабавување на рестриктивните Ковид мерки започнувајќи од март 2022 година и зголемувањето на економската активност заедно со нарушувањата во синџирите за снабдување резултираа со растечки стапки на инфлација. Истите беа дополнително зголемени како резултат на енергетската криза и до крајот на вториот квартал од 2022 година, достигнаа двоцифрен износ во најголем дел од светот“, соопшти компанијата.

Оттаму укажуваат дека глобалните движења и трендови неминовно влијаеле и се пресликале и во Македонија, што е очекувано со оглед на увозната зависност на земјата.

„Воениот конфликт, енергетската криза и растечката инфлација, неминовно влијаеа и врз работењето на „Макпетрол“ АД. Но, како резултат на посветеноста и ангажираноста на раководството, во текот на кризните месеци друштвото обезбеди непрекинато снабдување со нафтени деривати и природен гас, иако во одредени моменти поради нагло растење на цените на нафтените деривати, друштвото работеше и со загуба. И покрај сите предизвици, во текот на првата половина на 2022 година, „Макпетрол“ АД оствари позитивни резултати, односно солиден раст на приходите и добивката“, велат од компанијата.

За половина година 132 нови вработувања 

Од „Макпетрол“ велат дека главната причина за достигнувањето и надминувањето на планот за работење на друштвото за 2022 година е зголемениот количествен промет со нафтени деривати за 7 проценти, како резултат на растот на основната дејност на друштвото.

„Дополнително врз надминувањето на Планот свое влијание имаше и продажбата на останати стоки, која го надмина планот за 17 проценти. Со мерките кои што ги презема раководството на друштвото не се предизвика потреба од отпуштање на вработени, чиј што број дури и се зголеми во време на криза. Во текот на првата половина од 2022 година на „Макпетрол“ АД Скопје му се приклучија 132 нови вработени. Очекувањата за втората половина од деловната 2022 година се во согласност со планот за работење на друштвото“, велат од компанијата.

 

Во моментов нема коментари за веста. Биди прв да коментира...

Остави коментар