„ТТК Банка“ АД Скопје заклучно со 30.6.2022 година оствари добивка од 41,1 милиони денари(668.000 евра), што претставува повисок резултат за 1,2 проценти во однос на истиот период минатата година. Остварените нето-приходи од камати во периодот од 1.1.2022 до 30.6.2022 година изнесуваат 118,8 милиони денари и во однос на планот се остварени со 99,4 проценти.
„Нето-приходите од провизии и надоместоци за услуги во тековниот период изнесуваат 98,1 милиони денари и бележат зголемување за 5,8 проценти во однос на претходната година, што e резултат во најголем дел на зголемените приходи од провизии од новопонудените услуги преку проширената мрежа на банкомати и зголемениот обем на работењето со Mastercard® картичките, како и од поволните движења во понудата и реализацијата на услугите во областа на платниот промет од секторот стопанство и брокерското работење. Во однос на планот за овој период, нето-приходите од провизии и надоместоци за услуги се остварени со 102,1 проценти“, соопшти банката.
Нето-приходите од курсни разлики изнесуваат 6,4 милиони денари и бележат годишен раст од 21,7 проценти како резултат на зголемениот обем на тргувања на девизниот и на менувачкиот пазар. Во однос на планот се остварени со 104,1 проценти.
Раст на останатите приходи
Останатите приходи од работењето на банката изнесуваат 28,3 милиони денари и се повисоки за 35,2 проценти во однос на минатата година, како резултат во најголем дел од поголемиот износ на реализирани приходи од капитална добивка од продажба на преземени средства. Во однос на планот се остварени со 47,7 проценти.
Вкупните оперативни трошоци во анализираниот период изнесуваат 178,2 милиони денари и се за 8,4 проценти повисоки во однос на истиот период минатата година, како резултат во најголем дел од зголемените материјални и административни трошоци и од повисоките трошоци за плати. Во однос на планот се остварени со 98,8 проценти.
„Во споменатиов период, исправката на вредноста на финансиските средства и на посебната резерва за вонбилансна изложеност на нето-основа изнесува 24,2 милиони денари и е пониска за 22,7 милиони денари или за 48,4 проценти во однос на 30.6.2021 година, како резултат на подобрениот квалитет на кредитното портфолио. Во текот на првото полугодие од 2022 година прокнижена е загуба заради оштетување на нефинансиските средства во износ од 6,6 милиони денари“, информираат од банката.
Очекувања за претстојниот период
Неизвесноста околу натамошниот тек на настаните поврзани со пандемијата на коронавирусот што сѐ уште постои, зголемените цени на енергенсите и фрагментираните и нарушени синџири на снабдување заради конфликтот во Украина и заради воведените строги рестриктивни мерки во Кина, се најзначајните фактори на ризик коишто ќе влијаат врз идната динамика на растот на економската активност и на активностите на банкарскиот систем, велат од „ТТК Банка“.
„Сегашната клима сугерира дека и следниот период ќе биде предизвикувачки и затоа банката и понатаму внимателно ќе ги анализира тековните макроекономски параметри, ќе ги следи мерките, активностите и предвидувањата на економските авторитети и на носителите на економските политики и на операторите, ќе ги усогласува интерните индикатори и ќе го приспособува нејзиното работење на пазарните услови, со фокус кон одржување на ликвидноста и долгорочната стабилност. Банката ќе продолжи да дејствува проактивно, фокусирајќи се кон стабилно и профитабилно оперативно работење врз основа на реални и на предвидливи очекувања. Кредитната активност се очекува да продолжи да се реализира преку работата со населението и со малите и средни претпријатија, паралелно со севкупното закрепнување на економската активност и на зголемената побарувачка за кредити. Притоа, Банката ќе ги презема сите неопходни активности за одржување на квалитетот на портфолиото, развој на понудата на производи и изнаоѓање флексибилни решенија приспособени на потребите на клиентите - правни и физички лица кои се најзасегнати од кризата“, објаснуваат од банката.
.webp){kind=icon}
