Намалена добивката на „Македонски Телеком“

„Македонски Телеком“ за првите шест месеци од 2022 година оствари добивка од 776.362.000 денари, што е намалување за 12,4 проценти во споредба со истиот период од претходната година, покажува неревидираниот биланс на успех на компанијата објавен преку Македонската берза.

Приходите од продажба во првите шест месеци од 2022 година изнесуваат 5.872.399.000 денари, што претставува зголемување за 8,9 проценти во споредба со истиот период од претходната година.

На пазарот на мобилната телефонија МКТ има удел на пазарот од 48,4 проценти (интерна проценка, споредено со 47,7 проценти на крајот од истиот период од претходната година). Базата на претплатници на крајот од првите шест месеци од 2022 година изнесува 1.233.000 претплатници и е зголемена за 12,2 проценти во однос на истиот период од претходната година.

Приходите од говорни услуги (малопродажба) како и неговорни мобилни услуги на крајот од првите шест месеци од 2022 година бележат зголемување од 8 проценти во споредба со истиот период од претходната година.

„Зголемувањето главно произлегува од поголемиот број на пост - пејд претплатници и зголемувањето на приходите од роаминг заради намалувањето на рестрикциите поврзани со COVID – 19 пандемијата, а од друга страна пак има намалување на приходите од при-пејд главно заради миграција на претплатниците од при-пејд во пост-пејд како и помал обем на користење на говорни услуги во при-пејд сегментот. Зголемени се и приходите од неговорни услуги, главно како резултат на зголемени приходи од мобилен интернет заради зголемено користење на пакетни тарифни модели со вклучени неговорни услуги како и зголемен GPRS сообраќај од роаминг“, соопшти компанијата. 

Приходите од говорни услуги – големопродажба на крајот од првите шест месеци од 2022 година бележат намалување од 9,5 проценти во споредба со истиот период од претходната година.

Комбинираниот ARPU (просечниот приход по корисник) од говорни и неговорни услуги бележи намалување од 4,6 проценти во споредба со истиот период од претходната година, достигнувајќи 372 денари главно придвижен од помалиот обем на користење на говорни услуги во при-пејд сегментот.

„МКТ успеа да ја одржи водечката позиција на пазарот на фиксни говорни услуги со 62,2 проценти (интерна проценка, и бележи благо намалување споредено со 62,3 проценти на крајот од истиот период од претходната година), односно 225 илјади корисници на крајот од првите шест месеци од 2022 година. Приходите од говорни услуги од малопродажба во првите шест месеци од 2022 година во фиксниот сегмент се намалија за 1,4 проценти во споредба со истиот период од претходната година поради намалениот појдовен сообраќај за 21,6 проценти. На крајот од првите шест месеци од 2022 година бројот на корисници на фиксна телефонија (вклучувајќи ги и корисниците на конвергентни услуги) бележи зголемување за 1,1 проценти споредено со истиот период од претходната година“, информираат од компанијата.

Вкупниот број на пристапи на широкопојасен интернет (вклучувајќи ги и корисниците на конвергентни услуги) на крајот од првите шест месеци од 2022 година е зголемен за 3,1 проценти и изнесува 223,6 илјади во споредба со 216,9 илјади на крајот од истиот период од претходната година. 

Бројот на претплатници на широкопојасен интернет (без големопродажба) на крајот од првите шест месеци од 2022 година е зголемен за 3,3 проценти и изнесува 200,6 илјади во споредба со 194,1 илјади на крајот од истиот период од претходната година. Уделот на пазарот на широкопојасен интернет на крајот од првите шест месеци од 2022 година изнесува 48,9 проценти (интерна проценка, споредено со 49,5 проценти на крајот од истиот период од претходната година).

Инвестициите  во оптичката мрежа резултираат во континуиран раст на бројот на оптички пристапи во земјата. На крајот од првите шест месеци од 2022 година „Македонски Телеком“ овозможи повеќе од 260 илјади пристапи до оптика што е за 12 проценти повеќе споредено со истиот период од претходната година.

Во однос на ТВ пазарот, МКТ има лидерска позиција со 34,1 проценти (интерна проценка, споредено со 34,4 проценти на крајот од истиот период од претходната година) удел од вкупниот ТВ пазар.

„IPTV (дигитална телевизија преку Интернет протокол) услугата, поради високиот квалитет, интерактивноста и уникатното ТВ искуство, е одлично прифатена на пазарот и МКТ на крајот од првите шест месеци од 2022 година оствари зголемување на бројот на корисници на IPTV (вклучувајќи Magenta 1, 3 Play и други TV услуги) за 1,7 проценти во споредба со истиот период од претходната година што резултираше со база од 147 илјади корисници на крајот од првите шест месеци од 2022 година“, соопшти компанијата.

Приходите од малопродажен Интернет на крајот од првите шест месеци од 2022 година се зголемени за 1,1 проценти во споредба со истиот период од претходната година. Приходите од дигитална телевизија преку Интернет протокол („IPTV“) на крајот од првите шест месеци од 2022 година се зголемени за 3,7 проценти во споредба со истиот период од претходната година.

На страната на трошоците, на крајот од првите шест месеци од 2022 година оперативните расходи бележат зголемување од 13,6 проценти во споредба со истиот период од претходната година, што во најголем дел се должи на зголемувањето на трошоците за набавна вредност на трговски стоки, трошоците за суровини и други материјали и трошоците за амортизација. Трошоците за вработени се благо намалени за 0,1 проценти на крајот од првите шест месеци од 2022 година во споредба со истиот период од претходната година.

„Трошоците за набавна вредност на трговски стоки се зголемени за 44 проценти, во линија на зголемените приходи од продажба, додека трошоците за суровини,и други материјали се зголемени за 115,9 проценти на крајот од првите шест месеци од 2022 година во споредба со истиот период од претходната година, доминантно поради зголемување на цената на електричната енергија како резултат на глобалните движења на цената на електрична енергија“, информираат од компанијата. 

Во моментов нема коментари за веста. Биди прв да коментира...

Остави коментар