.webp){kind=icon}
„Пекабеско“ АД за периодот јануари-јуни 2022 оствари добивка од 44,2 милиони денари, што е намалување за 19 проценти во однос на истиот период од 2021 година, покажува консолидираниот биланс на успех на компанијата објавен преку Македонската берза.
Од компанијата како главни причини за послабиот резултат ги наведуват состојбата на замрзнати продажни цени со одлуката на Владата за периодот од 01.12.2021 до 28.02.2022 година, замрзнатите маржи на определени производи од 09.03.2022 па се до 30.09.2022, порастот на трошоците за енергија за 200 проценти во однос на минатата година како и раст на сите влезни цени за набавка на суровини и репроматеријали. Како дополнителен проблем се наведува појавата на Африканска чума и неможност за извоз на некои пазари во јануари и февруари.
Остварените вкупни консолидирани приходи од работењето во првото полугодие изнесуваат 2,5 милијарди денари и во споредба со остварените во истиот период во 2021 година бележат зголемување од 15 проценти.
„Во структурата на вкупните приходи најголемо учество од 98,7 проценти, имаат приходите остварени со продажба на готови производи, стоки и услуги кои во споредба со остварените во 2021 година бележат зголемување од 16 проценти“, соопшти компанијата.
Остварените вкупни консолидирани изнесуваат 2,45 милијарди денари и во споредба со остварените во истиот период во 2021 година бележат зголемување од 17 проценти.
Вкупните консолидирани инвестиции во основни средства во периодот јануари-јуни 2022 година изнесуваат 43,2 милиони денари, а во истиот период минатата година изнесувале 11 милиони денари.
„Инвестициите се главно во купено земјиште, производствена и транспортна опрема. Во првата половина од 2022 година не се направени значителни отписи или продажба на материјалните средства“, информираат од компанијата.
Бројот на вработени во „Пекабеско“ АД за периодот јануари-јуни 2022 изнесува 471 вработени, што е зголемување за 14 лица во однос на минатата година.
Во однос на очекувањата за престојниот период, од компанијата велат дека целокупното работење е поставено согласно препораките што се носат од страна на надлежните органи и се менаџираат соодветно.
„Ликвидноста на компанијата е задоволителна. Нема репрограмирање на обврските како спрема финансиските институции ниту спрема добавувачите во земјата и странство. Залихите со репроматеријали се поставени на соодветно ниво согласно економската ситуација во земјата и странство. Планираните продажби во вториот квартал како на домашен така и на странски пазар се остваруваат со добра динамика. Компанијата ги следи економските трендови во националната, регионалната и глобалната економија со цел да се здобие со информации корисни за процесот на одлучување“, соопшти компанијата.
