.webp){kind=icon}
Платформата „Онлифанс“ (OnlyFans Ltd.) му исплатила на сопственикот Леонид Радвински 472 милиони долари во дивиденди минатата фискална година, со што неговите приходи од сајтот достигнаа милијарда долари за три години.
Според финансиските документи во Велика Британија, Радвински заработил 338 милиони долари во 2022 година и 284 милиони долари претходната година. Четириесет и двегодишниот американски државјанин е единствен сопственик на холдинг компанијата на „Онлифанс“, „Феникс интернешнал“ (Fenix International Ltd).
Компанијата со седиште во Лондон, која вртоглаво се зголеми во популарност за време на заклучувањата поради ковид-19 и има репутација за хостирање порнографски и содржини за возрасни, кои се забранети на повеќето други социјални мрежи, гради мрежа на комичари, готвачи, лични тренери и други видови креатори за да ја прошири својата корисничка база.
„Онлифанс“ објави профит од околу 485,5 милиони долари во годината што заврши на 30 ноември 2023 година, што е за 20 отсто повеќе од претходната година, се наведува во извештајот објавен во петокот од „Феникс интернешнал“.
Приходите исто така се зголемиле за околу 20 отсто во однос на претходната година, на 1,3 милијарда долари, според извештајот. Вкупниот број на креатори на платформата се зголемил за 29 отсто, на 4,1 милиони, а корисниците се зголемиле за 28 отсто, на 305 милиони.
Радвински купи мнозински удел во „Онлифанс“ во 2018 година од британските основачи - татко и син - Гај и Тим Стокли, кои ја основаа страницата во 2016 година.
Роден е во украинскиот пристаништен град Одеса, но семејството на Радвински се преселило во Чикаго кога тој бил дете. Тој сега живее на Флорида, според неговата веб-страница.
