text size
Менаџерот на „БНП Парибас“ (BNP Paribas SA) во Лондон се соочува со обвинувања дека наредил да се намалат бонусите на некои од вработените жени за да се зголемат платите на нивните машки колеги, тврди брокерка што претходно доби значаен случај против француската банка.
Стејси Меккејн, која е главна брокерка за суровини, против банката доби историски случај во вредност од два милиона фунти (2,6 милиони долари) откако докажа дека за 2019 година е значајно помалку платена од своите машки колеги.
Сега Меккејн по вторпат ја тужи банката тврдејќи дека неименувани вработени се сведоци на докази за дополнителни тужби за дискриминација во лондонската филијала на банката.
Меккејн тврди дека Фредерик Зорзи, актуелен глобален раководител за примарни пазари, им рекол на менаџерите под негово раководство да намалат дури 60 проценти од бонусите за жените во 2019 година и рамномерно да ги прераспределат меѓу машките шефови, се наведува во документацијата подготвена за на суд.
Од БНП велат дека целосно ги истражиле наводите по обвинувањата уште првиот пат кога биле изнесени.
Зорзи не одговори на поединечните барања за коментар, кои му беа упатени преку банката.
Меккејн претставува трн во око за француската банка откако стана првата личност што ја принуди големата француска институција на ревизија по основ на еднаквост на плати, која беше објавена минатата година. Во нејзините нови тврдења како извор на нејзините информации се наведени две неименувани вработени.
„Таа не е некој што ќе излезе и ќе ја слави победата. Мораше да продолжи со борбата“, рече нејзиниот адвокат на суд.
Меккејн обвинува дека БНП со години непотребно го одолжува процесот со „лажни истраги“.
Според изјавата на една од нејзините сведоци, поранешна вработена на БНП рекла дека видела електронска порака од почетокот на 2019 година во која Зорзи им давал дискриминаторски насоки на машките шефови од тимот. Друга вработена, пак, се соочила директно со Зорзи за тој да ја врати оцената за нејзината успешност.
Од БНП тврдат дека таква електронска пошта никогаш не е пронајдена.
„Целосно ги истраживме сите овие обвинувања уште кога се појавија, процес што подоцна беше предмет и на независна истрага откако беа вклучени и актуелните жалби“, велат од БНП.
Во четвртокот адвокатите на БНП побараа судот да ги избрише сите тврдења за дискриминација од страна на Меккејн, велејќи дека некои од нив се застарени. Другите тврдења ќе бидат претставени на следното рочиште.
Како дел од претходното барање на Меккејн, таа има право на плата во иднина од 177.000 фунти годишно сè до нејзиното пензионирање поради тоа што претходно била отпуштена од работа поради здравствени проблеми со кои се соочила. Таа исто така се бори за зголемување на својата плата во согласност со инфлацијата, тврдејќи дека понудените пет проценти се дискриминаторски.
Адвокатите на Меккејн проценуваат дека доколку се прифати нејзиното ново барање, таа ќе има право на исплата на нето-плата од вкупно 3,8 милиони фунти, во кои се вкалкулирани изгубените плати, годишните одмори и надоместокот за пензионирање, како и надомест за повреда на чувствата и за навреда.
.webp){kind=icon}
