Швајцарските производители на часовници предупредија на влошување на изгледите за индустријата, иако извозот минатиот месец се зголеми поттикнат од побарувачката за скапи часовници направени од благородни метали.
„И покрај тоа, изгледите за индустријата сè уште се негативни, како и изгледите за остатокот од годината“, се истакнува во извештајот.
Податоците за извозот покажуваат значајни разлики меѓу швајцарските брендови бидејќи побарувачката за часовници со средна и почетна цена драстично е падната, додека поскапите часовници бележат подобри резултати.
„Побарувачката за врвните часовници продолжува да оди добро. За другите брендови 2024 година претставува кочница за растот по бумот по пандемијата на ковид“, вели аналитичарот на „Вонтобел“ (Vontobel) Жан-Филип Берчи.
Извозот на часовници чија вредност во големопродажба надминува 3.000 франци покажа позитивни резултати минатиот месец, зголемувајќи се за речиси пет проценти според количеството, односно 15 отсто по вредноста. Извозот на другите часовници со цени пониски од таа граница падна за 11 проценти по количество и 14 отсто по вредност. Според тоа, вкупниот извоз по единици падна за 10 проценти.
Овие месечни бројки ја нагласуваат сериозноста на економското забавување предводено од Кина што се бранува низ индустријата. Извозот во Кина, втор по големина пазар зад САД, падна за речиси шест проценти, додека испораките во Хонгконг се намалија за 11 отсто бидејќи падот на вредноста на недвижностите влијае на расположението на клиентите.
Производителите на часовници се жалат поради непредвидливоста на среден рок, што ги поттикнува да бидат повнимателни. Значителниот пад на побарувачката што им штети на швајцарските брендови на часовници, ги става во опасност и работните места. Па, од Федерацијата ја повикаа швајцарската национална банка да преземе чекори за да го ослабне силниот франк, кој инаку врши притисок врз индустријата.
Производителите на компоненти што ја снабдуваат индустријата со делови за механизмите на часовниците, кутии за часовници, бројчаници и белезици страдаат уште повеќе, велат од Федерацијата.
.webp){kind=icon}
