text size
„Старбакс“ (Starbucks Corp.) соопшти дека напад со рансомвер на софтвер од трета страна го нарушил неговиот систем за следење на распоредот на вработените, принудувајќи го гигантот за кафе рачно да ги пресметува часовите и платите на работниците.
„Блу Јондер“ (Blue Yonder Group Inc.), подружница на „Панасоник“ (Panasonic), која обезбедува софтвер за управување со синџирот на снабдување, изјави дека нејзините системи биле нарушени од „инцидент со рансомвер“ на 21 ноември. „Старбакс“ е меѓу нивните клиенти и го користи софтверот на „Блу Јондер“ за распоредување на смените и следење на работните часови на вработените во Северна Америка, изјави портпарол на компанијата.
Продавниците на „Старбакс“ се принудени да користат методи како пенкало и хартија за распоредување на вработените, додаде портпаролот, посочувајќи дека инцидентот не влијаел на работата на продавниците. Нападот врз „Блу Јондер“ ги погодува продавниците управувани од компанијата во САД и во Канада.
Во порака до работниците, „Старбакс“ посочува дека „Блу Јондер“ не обезбедил временска рамка за решавање на проблемот.
„Се надеваме дека овој прекин нема да влијае на обработката на платите за идните недели“, истакнуваат од „Старбакс“. „Сепак, продолжуваме да бараме начини за подобрување на точноста и обработката на платите доколку прекинот продолжи“.
Во друга порака компанијата сподели шаблон за помош на менаџерите во изработка на распоредите за неделата од 9 декември. Компанијата обично ги разработува распоредите три недели однапред.
Во изјава во понеделникот, од „Блу Јондер“ посочија дека ги известиле релевантните клиенти за инцидентот и „ќе продолжат да комуницираат соодветно“.
„’Блу Јондер’ доживеа нарушувања за кои беше утврдено дека се резултат на инцидент со рансомвер“, изјави портпаролката на компанијата Марина Ренеке. „Откако дознавме за инцидентот, тимот на ’Блу Јондер’ работи напорно заедно со надворешни фирми за сајбер-безбедност за да напредува во процесот на обновување. Имплементиравме неколку одбранбени и форензички протоколи“.
Нападот претходно беше пријавен од Си-ен-ен (CNN), од каде што изјавија дека некои синџири на продавници за храна во Обединетото Кралство презеле чекори за справување со инцидентот.
.webp){kind=icon}
