text size
Фармацевтската компанија „Ново Нордиск“ (Novo Nordisk) во четвртиот квартал пријави профит од 3,98 милијарди долари, што е за 29 проценти повеќе од претходниот квартал. Резултатот, кој ги надмина очекувањата, е последица на зголемената побарувачка за лековите против дебелина „вегови“ (Wegovy), но компанијата предвиде делумно забавување на продажбата во 2025 година.
Годишниот чист профит се зголеми за 21 процент, на 14,11 милијарди долари, што исто така ја надмина процената од 13,85 милијарди долари за 2024 година. Акциите на данската фармацевтска компанија на берзата во Лондон се зголемија за 4,18 проценти.
Производителот на лекови во трите месеци до крајот на декември забележа 107-процентно зголемување на продажбата на лекот „вегови“, на 2,76 милијарди долари, што е малку помалку од предвидувањата, пишува Си-ен-би-си (CNBC).
Вкупната продажба на компанијата, која произведува и лекови за лекување дијабетес и ретки болести, во четвртиот квартал се зголеми за 30 проценти, а на годишно ниво за 26 проценти. За растот придонесе главно побарувачката во Северна Америка, Европа, Блискиот Исток и во Африка.
Помалку оптимистично за годинава
За годинава компанијата предвидува побавен раст на продажбата, и тоа меѓу 16 и 24 проценти, што е под предвидувањата од минатата година. Од „Ново Нордиск“ велат дека тоа е последица на „сѐ посилната конкуренција и постојаниот притисок врз цените на пазарот за снабдување со лекови против дијабетес и дебелина“.
.webp){kind=icon}
