Илон Маск соопшти дека неговиот стартап „Икс еј-ај“ (xAI) ја купил платформата X, која исто така тој ја контролира, по проценка на вредноста од 33 милијарди долари, што претставува изненадувачки пресврт за социјалната мрежа, која претходно беше позната како Твитер.
„Комбинираната вредност на 'Икс еј-ај' е 80 милијарди долари, а само X вреди 33 милијарди долари“, напиша милијардерот во вчерашната објава на социјалната мрежа X. Вредноста на X е 45 милијарди долари со вклучен долг од 12 милијарди долари, рече тој, опишувајќи го купувањето како трансакција само со акции.
Овој договор дава нова комбинација, наречена „Икс еј-ај холдингс“ (XAI Holdings), чија вредност без долгови надминува 100 милијарди долари, според анонимен извор запознаен со договорот, кој не беше објавен во јавноста. „Морган Стенли“ (Morgan Stenley) беше единствениот банкар на договорот, кој ги претставуваше двете страни, велат други извори.
За Маск, ваквиот договор го рационализира неговиот бизнис и ја зацврстува врската помеѓу поранешниот Твитер и „Икс еј-ај“, кој ги користи информациите од социјалната мрежа за да го подобри својот чет-бот. Договорот нуди решение и за другите инвеститори на Х по неколкумесечна неизвесност во врска со состојбата со нивните инвестиции бидејќи промените на Маск доведоа до пад на бројот на корисници и огласувачи.
„Иднината на 'Икс еј-ај' и X се поврзани“, објави Маск. „Денеска официјално правиме чекор кон комбинирање податоци, модели, компјутери, дистрибуција и таленти. Оваа комбинација ќе отклучи огромен потенцијал со спојување на напредната способност за вештачка интелигенција и експертиза на 'Икс еј-ај' со огромниот опсег на X“.
Маск, најбогатиот човек на светот, го купи Твитер за 44 милијарди долари кон крајот на 2022 година, во трансакција која го вклучуваше и долгот. Откако ја презеде контролата врз платформата, тој брзо се фокусираше на намалување на трошоците, отпуштајќи илјадници работници, затворајќи канцеларии и преговарајќи за нови договори. Тој, исто така, се обиде да го направи Твитер поусогласен со она што тој го нарекува „апсолутна слобода на говор“, укинувајќи одредени ограничувања за содржината и дозволувајќи некои забранети профили да се вратат.
Меѓутоа, Маск уништи и значаен дел од рекламниот бизнис на мрежата. Огласувачите ја напуштија страницата поради страв дека нивните промовирани објави ќе бидат прикажани заедно со неприфатлива корисничка содржина. Дури и со очекуваниот раст на приходите од продажба за 2025 година, рекламниот бизнис на X сепак ќе биде приближно половина од обемот што го имаше кога Маск ја презеде компанијата.
Во текот на изминатата година Маск ја користеше услугата за промовирање на Грок (Grok), чет-бот развиен од „Икс еј-ај“, кој делумно беше обучен од објавите од корисниците на X. Стартапот се натпреварува со фирми за вештачка интелигенција како „Опен еј-ај“ (OpenAI), кои Маск ги ко-основаше пред да дојде до спор со таа компанија.
„Ова му помага на системот доста добро да се интегрира“, рече Швета Каџурија, аналитичарка во „Волфе рисрч“ (Wolfe Research), која смета дека договорот е позитивен за двата бизниси на Маск. „Ова му дава уникатна предност на 'Грок' затоа што овозможува пристап до огромни количини на податоци за обука, истовремено дозволувајќи му на 'Икс еј-ај' да го контролира, па дури и да го прекине протокот на податоци до други компании“.
Џин Манстер, водечки партнер во „Дипвотер асет менаџмент“ (Deepwater Asset Management) и инвеститор во двете компании, напиша на X дека договорот „има многу смисла“ бидејќи му дава на „Икс еј-ај“ внатрешна, комерцијална база на податоци до која другите компании немаат пристап. „'Грок' ги носи мозоците. X ја носи дистрибуцијата“, напиша тој. „'Опен еј-ај' има мозоци и дистрибуција на брендови (на пример, 'Епл'), но нема комерцијална база на податоци, како X. Тоа е долгорочна предност на 'Икс еј-ај'“.
Портпаролот на мрежата Х одби да коментира, упатувајќи го „Блумберг“ на објавата на извршната директорка на X, Линда Јакарино. „Иднината не може да биде посветла“, напиша таа. Не е јасно дали ова спојување ќе влијае на нејзината позиција како директор.
Маск има долга историја на спојување на неговите различни операции преку споделување на инвеститори, технологија и вработени. Неговиот бизнис со вештачка интелигенција, покрај обуката за корисничките податоци на X, делеше и канцелариски простор со компанијата во Сан Франциско. X, исто така, акумулираше удел од шест милијарди долари во „Икс еј-ај“ до јануари, дополнително поврзувајќи ги бизнисите.
Инвеститорите во „Икс еј-ај“ ги вклучуваат „Секуоја капитал“ (Sequoia Capital), „Андресен Хоровиц“ (Andreessen Horowitz), „Фиделити инвстментс“ (Fidelity Investments) и „Блекрок“ (BlackRock Inc). Некои од инвеститорите во овој стартап со вештачка интелигенција, исто така, го поддржаа X, како „Андресен Хоровиц“ и „Секуоја капитал“.
Аналитичарот на „Блумберг интелиџенс“ (Bloomberg Intelligence), Мендип Синг, вчера напиша дека преземањето на X од страна на „Икс еј-ај“ би можело да ја постави основата за зделки кои вклучуваат други социјални мрежи.
Синг напиша дека оваа зделка „може да биде знак дека конкурентите, вклучително 'Опен еј-ај', 'Антропик' (Anthropic), 'Перплексити' (Perplexity) и 'Мистрал' (Mistral), ќе продолжат со зделки што ќе го подобрат нивниот досег и дистрибуција до корисниците“. „Веруваме дека помалите играчи на социјалните медиуми активно ќе бараат да се спојат со големи даватели на јазични модели, со оглед на премиум вредноста на 'Икс еј-ај' од 80 милијарди долари, што е повеќе од комбинираните пазарни вредности на Снеп (Snap), Пинтерест (Pinterest) и Редит (Reddit)“.
Во поголемиот дел од владеењето на Маск како сопственик на X се веруваше дека социјалната мрежа е проценета далеку под 44 милијарди долари колку што Маск плати кон крајот на 2022 година. „Фиделити“, на пример, во ноември ја намали вредноста на својот капитал во оваа компанија за повеќе од 70 отсто.
Меѓутоа, X забележа мало деловно закрепнување откако Маск стана главен советник на претседателот Доналд Трамп, врска што врати некои огласувачи кои се обидоа да им се додворуваат на двајцата. X собра скоро една милијарда долари нов капитал од инвеститорите, во договор што ѝ дава на компанијата вредност во согласност со времето кога Маск ја презеде фирмата во 2022 година, објави „Блумберг“ овој месец.
X е на пат да ја постигне својата прва година на раст на приходите од реклами откако Маск ја презеде компанијата, иако се верува дека некои од тие продавачи се враќаат од страв дека Маск може да ги тужи. Се предвидува дека компанијата ќе генерира 1,31 милијарди долари приходи од реклами во САД во 2025 година, што е зголемување од 17,5 отсто, според истражувачката компанија „Емаркетер“ (Emarketer). На глобално ниво, продажбата на реклами на X за оваа година се проценува на 2,26 милијарди долари, што претставува зголемување од 16,5 проценти.
- Текстот е напишан со помош на Рили Грифин.
.webp){kind=icon}
