„Новартис“ со раст на продажбите и заработката во првиот квартал

Швајцарската фармацевтска компанија „Новартис“ (Novartis) во својот квартален извештај за заработката објави подобри резултати од очекуваните, а наедно ги зголеми и своите прогнози за целата година.

Продажбата се зголемила за 15 проценти, на 13,2 милијарди долари, додека аналитичарите анкетирани од ЛСЕГ (LSEG) проценија дека ќе изнесува 13,12 милијарди долари. Кварталните приспособени основни оперативни приходи се зголемија за 27 проценти, на 5,58 милијарди долари, што е исто така над очекуваните 5,07 милијарди долари.

Прогнозите за остатокот од годината исто така се зголемија. Затоа, компанијата прогнозира висок едноцифрен раст на нето-приходите од продажба и низок двоцифрен раст на основната добивка. Фармацевтската индустрија моментално се прашува какви царини ќе воведе Доналд Трамп врз нејзините производи, бидејќи претходно месецов најави истрага за работењето на индустријата.

Фармацевтските производи досега беа ослободени од сеопфатни увозни давачки, но Трамп во март предупреди дека целните давачки за фармацевтските производи ќе бидат воведени во „блиска иднина“, објави „Си-ен-би-си“ (CNBC).

Перспективата за високи царини поттикна зголемени инвестиции во САД од страна на европските фармацевтски компании, кои се стремат да го одржат пристапот до профитабилен пазар и да го поедностават домашното производство. „Новартис“ претходно месецов објави дека ќе инвестира 23 милијарди долари во текот на следните пет години за изградба и проширување на десет објекти во САД, што, како што велат оттаму, ќе обезбеди сите клучни лекови на „Новартис“ за американскиот пазар да се произведуваат дома.