Царините на Трамп ќе му ја намалат добивката на „Форд“ за 1,5 милијарда долари

„Форд“ (Ford Motor Co.) ја суспендира својата финансиска прогноза за целата година и соопшти дека царините на претседателот Доналд Трамп за автомобилите ќе нанесат удар врз добивката, приклучувајќи им се на другите ривали погодени од нестабилните глобални трговски политики.

Производителот на возила очекува дека годинава царините ќе ги намалат приспособените добивки пред камати и даноци (ЕБИТ) за околу 1,5 милијарда долари на нето-основа, соопшти компанијата додека го објавуваше првиот квартален профит што ги надмина очекувањата. Вкупниот ефект од царините се проценува на околу 2,5 милијарди долари, од кои една милијарда компанијата очекува да компензира со мерки како што е т.н. царински транспорт за заштита на автоделовите од царински давачки додека преминуваат меѓународни граници, изјави за новинарите финансиската директорка Шери Хаус.

„Форд“ наведе седум фактори за повлекувањето на претходната прогноза за околу 8,5 милијарди долари приспособена добивка пред камати и даноци за годинава, вклучувајќи ги и потенцијалните „индустриски прекини на синџирите за снабдување“ поврзани со царините на Трамп и ризикот дека давачките може да се зголемат во иднина.

Акциите на „Форд“ паднаа за 2,4 отсто во тргувањето по затворањето на пазарите во понеделникот. Акцијата до петокот имаше добивка од околу 3,8 отсто годинава, подобро од падот од 3,3 отсто на индексот S&P 500. Компанијата најави дека ќе даде нова прогноза кога ќе го објави извештајот за вториот квартал.

Извршниот директор Џим Фарли призна дека е тешко да се предвиди крајниот ефект на царините врз трошоците, особено кога администрацијата на Трамп истовремено преговара за нови трговски договори, вклучувајќи и со САД, Канада и Мексико.

„Ситуацијата е доста динамична и мислам дека ова е ново искуство за сите нас“, изјави Фарли во понеделникот на конференциски разговор со аналитичари. „Сите треба да бидеме трпеливи и да почекаме да видиме како ќе се одвиваат овие политики“.

„Форд“ е најновиот производител на автомобили што укажува на високата цена од променливата трговска стратегија на Трамп. Трамп тврди дека царините од 25 отсто на увезените возила и делови се потребни за да се вратат производството и работните места во САД. Но автомобилските компании предупредуваат дека долготрајните давачки ќе ги зголемат трошоците, ќе ги доведат во прашање работните места и дополнително ќе ги зголемат цените на новите автомобили, кои веќе во просек се приближуваат до 50.000 долари.

Фарли минатата недела изјави дека компанијата нема да ги зголеми цените на своите возила додека не види како  ќе реагираат конкурентите на дополнителните трошоци од царините.

Ударот од 1,5 милијарда долари што сега го очекува „Форд“ доаѓа и покрај олеснувањето што им беше дадено на автомобилските компании минатата недела. Трамп ги поштеди увозите подложни на автомобилските царини од дополнителни давачки што се однесуваат на други производи, како што се челик и алуминиум. Белата куќа исто така најави дека царините за автомобилски делови ќе се применуваат постепено во наредните две години, за да им се даде време на компаниите да го пренесат производството во САД.

„Форд“ во понеделникот соопшти дека бара начини да произведува повеќе делови во САД. Но Фарли рече дека компанијата ѝ укажала на Белата куќа колку ќе ја чини оваа промена.

„Овие бројки се огромни“, изјави Фарли во врска со вкупниот удар од 2,5 милијарди долари. „Бевме многу јасни со владата за тоа каква флексибилност ни е потребна“.

Мерките на Белата куќа објавени минатата недела беа „навистина важни чекори напред“, изјави Хаус на брифингот за новинарите во понеделникот, додавајќи дека трговската политика сѐ уште останува неизвесна. Таа рече дека „Форд“ исто така чека да види дали може да добие олеснување за домашната содржина во возилата што ги увезува од Мексико.

Изложеноста на „Форд“ кон царините е помала во споредба со другите производители од Детроит, бидејќи фабриката во Диарборн, Мичиген, произведува 80 отсто од возилата што ги продава во САД. „Џенерал моторс“ (General Motors) минатата недела исто така ја намали прогнозата за добивката годинава и соопшти дека нејзината изложеност на царините може да достигне и до 5 милијарди долари. ЏМ на 2 мај отпушти работници и го намали производството во канадската фабрика за „шевролет силверадо“ (Chevrolet Silverado), пренесувајќи дел од производството во Индијана.

„Форд“ се соочува и со зголемени трошоци за гаранции и други расходи, вклучувајќи и очекувани загуби од 5,5 милијарди долари годинава во електричниот сегмент. Трошоците за лансирање на новите верзии на големите модели на теренци „експедишн“ (Expedition) и „линколн навигатор“ (Lincoln Navigator), исто така, влијаеле врз кварталната добивка.

Приспособениот профит на „Форд“ за првиот квартал изнесува 14 центи по акција, подобро од очекуваната загуба од 4 центи според аналитичарите.

Секторот „Форд блу“ (Ford Blue), кој произведува возила со мотори со внатрешно согорување и хибриди, забележа пад на добивката пред камати и даноци од 901 милион лани на 96 милиони долари, бидејќи трошоците за новите теренски модели го оптоварија билансот. Сепак, резултатот е подобар од предвидените 288 милиони долари загуба од страна на аналитичарите на Волстрит. Продажбата на возила на „Форд“ во САД во првиот квартал опадна за 1,3 отсто.

Високопрофитниот оддел „Форд про“ (Ford Pro), кој произведува комерцијални возила, оствари добивка од 1,3 милијарда долари пред камати и даноци, во согласност со очекувањата на аналитичарите.

Одделот „Модел Е“ (Model E), кој го опфаќа електричниот сегмент, забележа квартална загуба од 849 милиони долари, помала од предвидените 1,4 милијарда долари. Продажбата на електрични возила на „Форд“ се зголеми за 11,5 отсто во првиот квартал, но тие учествуваат со само 4,5 отсто во вкупната испорака на возила на компанијата.