Компанијата на Џек Дорси, „Блок“ (Block Inc.), ќе биде вклучена во индексот S&P 500, што претставува значаен чекор што ја нагласува растечката улога на дигиталните плаќања и криптовалутите во мејнстрим финансиите.
Оваа финтек-компанија ќе ја замени „Хес“ (Hess Corp.) во индексот, по аквизицијата на енергетската компанија од страна на „Шеврон“ (Chevron Corp.), вредна 53 милијарди долари.
Промените ќе стапат во сила пред почетокот на тргувањето на 23 јули, според соопштението од S&P Dow Jones Indices објавено во петокот. Акциите на „Блок“ пораснаа и до 14 отсто во надворешното (after-hours) тргување.
„Блок“, порано познат како „Сквер“ (Square), се трансформираше од секторот за плаќања во поширок финтек-играч, нудејќи директни трансфери меѓу корисници, услуги за трговци и сè повеќе - потрошувачко кредитирање.
Годинава индустриската банкарска подружница СФС (Square Financial Services Inc.) доби одобрување од Федералната корпорација за осигурување депозити на САД (FDIC) да започне со нудење потрошувачки заеми директно преку производот Кеш ап бороу (Cash App Borrow).
Компанијата исто така интегрира можности за плаќање со биткоин на своите Сквер-терминали, што го одразува долготрајното застапување на Дорси за биткоин. Тој останува влијателен глас во светот на дигиталните средства, неодамна споделувајќи проекти со отворен код на мрежата X.
Целта на „Блок“ е Кеш ап да го развие во целосно банкарско и кредитно решение, и покрај тоа што компанијата се соочува со нестабилни квартални резултати.
Вклучувањето во индексот S&P 500 може значително да го подигне профилот на една компанија и тоа станува сè поважно со растот на пасивните инвестициски фондови. Од друга страна, исклучувањето од индексот може негативно да влијае врз цената на акциите, бидејќи индексните фондови продаваат акции за да се усогласат со новиот состав на индексот.
.webp){kind=icon}
