„Тотал“ купува 50 отсто од енергетските капацитети на ЕПХ за 5,1 милијарда евра

„Тотал“ (TotalEnergies SE) се согласи да купи 50 отсто удел во портфолио од енергетски производствени капацитети во Западна Европа, за околу 5,1 милијарди евра (5,9 милијарди долари), продолжувајќи да се шири во секторот додека некои од големите нафтени и гасни конкуренти се повлекуваат.

Компанијата ќе ги преземе средствата од енергетската холдинг-компанија „ЕПХ“ (EPH) на чешкиот бизнисмен Даниел Кретински, плаќајќи во нови акции, соопштија од „Тотал“ денеска. Овие акции претставуваат околу 4,1 отсто од основната главнина на „Тотал“, со што чешката фирма ќе стане еден од најголемите акционери по завршувањето на трансакцијата.

Француската нафтена групација го зголемува присуството во секторот на електрична енергија, следејќи стратегија на диверзификација што има цел 20 отсто од продажбата на енергија да доаѓа од електрична енергија до 2030 година. Таа активно купува соларни, ветерни и батериски проекти во Европа и Северна Америка, но и гасни електрани — користејќи ги ценовните флуктуации на двата пазара и обложувајќи се на растечката побарувачка што ја носи бумот на вештачката интелигенција.

Последната зделка ќе ѝ обезбеди на „Тотал“ гасни и биомасни електрани и батериски проекти во Италија, Обединетото Кралство, Ирска, Холандија и Франција. Поради тоа, „Тотал“ очекува одделот за интегрирана енергија да генерира позитивен слободен паричен тек и да придонесе за исплата кон акционерите уште во 2027 година – наместо во 2028 година, како што беше претходно планирано.

„Зделката ѝ обезбедува на „Тотал“ клучна тежина на европскиот пазар за електрична енергија, ја прави нејзината структура на производството на електрична енергија поотпорна и ја подобрува предвидливоста на паричните текови од електричниот сегмент“, изјави Фредерик Лорек, аналитичар во „Алфа Валју“ (AlphaValue). „Цената на зделката е логична.“

Акциите на „Тотал“ колебливо започнаа на берзата, а околу 10:39 часот во Париз беа повисоки за 0,4 отсто.

Компанијата ја намали својата прогноза за нето капитални трошоци за 1 милијарда долари годишно, на минимум 14 милијарди долари годишно во периодот 2026–2030, од кои до 3 милијарди ќе бидат насочени кон енергетскиот сегмент. Намалувањето на капиталните трошоци може да ѝ помогне на „Тотал“ да го задржи долгот под контрола, во услови кога очекуваниот раст на глобалното производство на нафта и гас врши притисок врз цените на јаглеводородите.

„Тотал“ го задржа целното производство на електрична енергија за 2030 година до 120 терават-часови.

Трансакцијата ќе доведе до создавање заедничка компанија во која „Тотал“ и „ЕПХ“ ќе имаат по 50 отсто, опфаќајќи повеќе од 14 гигавати флексибилен капацитет во работа или изградба. Завршувањето се очекува во средината на 2026 година, по добивање на потребните регулаторни одобренија.