„Би-пи“ планира продажба на мнозинскиот удел во „Кастрол“ вреден 10 милијарди долари

„Би-пи“ (BP Plc) постигна договор за продажба на мнозински удел во „Кастрол“ (Castrol) на американската инвестициска фирма „Стоунпик“ (Stonepeak Partners), при што бизнисот е проценет на 10,1 милијарди долари, вклучувајќи го и долгот.

Британскиот нафтен гигант ќе се откаже од 65 отсто од уделот во бизнисот со моторни масла, со што ќе обезбеди околу 6 милијарди долари приходи, соопшти компанијата во изјава во средата. „Би-пи“ ќе задржи малцински удел преку заедничко вложување.

Оваа зделка претставува значаен дел од планот на „Би-пи“ за продажба на средства во вредност од 20 милијарди долари до крајот на 2027 година. Компанијата се ослободува од дел од своите средства за да ги подобри повеќегодишните слаби деловни резултати, поради кои се најде под зголемен притисок од инвеститорот „Елиот инвестмент менаџмент“ (Elliott Investment Management).

„Би-пи“ ја започна постапката за продажба на „Кастрол“ уште во февруари, кога тогашниот извршен директор Мареј Окинклос го претстави стратегиското ресетирање на компанијата. Тој најави повторно насочување кон нафтата и гасот, драстично кратење на трошоците и намалување на долгот, но планот беше критикуван како недоволно амбициозен од страна на инвеститорот што има активно влијание врз управувањето, „Елиот инвестмент менаџмент“.

Иако Окинклос во текот на летото порача дека компанијата „може и мора да постигне подобри резултати“, новиот претседател на управниот одбор Алберт Манифолд минатата недела одлучи да го замени, назначувајќи ја Мег О’Нил, извршна директорка на „Вудсајд енерџи груп“ (Woodside Energy Group Ltd.), која ќе ја преземе функцијата во април.