„Орстед“ поднесе тужба против суспензијата на ветерниот проект од страна на Трамп

„Орстед“ (Orsted A/S) поднесе тужба поради одлуката на администрацијата на Трамп да го суспендира закупот на проект за ветерна енергија во близина на брегот на Роуд Ајленд, кој е речиси завршен.

Одлуката на американската влада „е спротивна на важечките закони“, соопшти данскиот инвеститор и партнерот во заедничкото вложување „Скајборн“ (Skyborn Renewables). Компаниите ќе побараат суспензијата да биде укината додека судот не донесе конечна пресуда.

Ова е втор пат проектот „Револушн Винд“ (Revolution Wind) да биде на удар на администрацијата. По налогот за запирање на работите издаден летово, судија одобри градежните активности да продолжат додека трае правната постапка. Претседателот Доналд Трамп агресивно се спротивставува на растот на оваа индустрија, укинувајќи дел од климатските политики од ерата на Бајден и поддржувајќи фосилни горива.

Акциите на „Орстед“ (Orsted) пораснаа и до 3,7 отсто на стартот на тргувањето во денеска изутрина. Нивната вредност минатата година се намали за повеќе од 30 отсто, под притисок од повторените напади на Трамп врз секторот, како и поради одлуката на менаџментот да спроведе масовна продажба на акции, што практично претставуваше финансиска поддршка од данската влада.

Проектот „Револушн Винд“ „ќе претрпи значителна штета доколку продолжи наредбата за суспензија на закупот“, соопшти компанијата. Изградбата е завршена 87 отсто и се очекува проектот да почне да испорачува електрична енергија за домаќинствата во САД уште годинава.

Американските власти во декември ги суспендираа закупите за пет офшор-ветерни проекти на источното крајбрежје, повикувајќи се на загриженост за националната безбедност поради можни пречки на радарските системи од големите турбини. Освен „Револушн Винд“, погоден беше и проектот „Санрајс Винд“ (Sunrise Wind), исто така на „Орстед“ во близина на брегот на Њујорк.

Компанијата соопшти дека „и понатаму ги разгледува сите опции“ во врска со тој проект, вклучително и можни правни чекори. И други големи инвеститори, меѓу кои и „Еквинор“ (Equinor ASA), водат разговори со американските власти поради безбедносните прашања поврзани со офшор-ветерната енергија.