Рекорден раст на нарачките за АСМЛ поради бумот на вештачката интелигенција

Компанијата АСМЛ (ASML Holding NV), која е водечки производител на напредни машини за литографија што се клучни за производство на чипови, ја надминаа прогнозата на аналитичарите за нарачките во четвртиот квартал од 2025 година. Рекордните нарачки од 13,2 милијарди евра (15,8 милијарди долари) беа предизвикани од зголемената побарувачка за напредната опрема, која е основа за брзиот развој на инфраструктурата за вештачка интелигенција (ВИ).

Оваа бројка ја надминува прогнозата на аналитичарите, која изнесуваше 6,85 милијарди евра, според податоците на „Блумберг“. АСМЛ, кој е единствениот производител на опрема за екстремна ултравиолетова (EUV) литографија, која е неопходна за производство на напредни полупроводници, има договори со сите водечки производители на чипови, како што се ТСМЦ (TSMC), „Интел“ (Intel) и „Енвидија“ (Nvidia).

Главни корисници на овие машини се производителите на чипови што создаваат опрема за суперкомпјутери и инфраструктура за вештачка интелигенција. На пример, „Енвидија“, чие основно производство на чипови е фокусирано на ВИ-акцелератори, ја користи опремата на АСМЛ за производство на најсовремените чипови потребни за обука и операција на ВИ-модели.

Растот на инфраструктурата за ВИ е процес забрзан во 2026 година, со многу компании како „Mета“ и „Мајкрософт“, кои инвестираат стотици милијарди долари во изградба на центри за податоци. Тоа ја поттикнува потребата за зголемени капацитети за чипови, што резултира во огромна побарувачка за машините на АСМЛ.

Иако АСМЛ забележа рекорден раст на нарачките, компанијата исто така најави план за отпуштање на околу 1.700 работници, главно во Холандија и некои во САД, како дел од напорите да ја поедностави организацијата. Тоа ќе претставува околу 4 отсто од вкупниот број на вработени во компанијата.

„Постигнавме голем напредок и се гордееме со тоа, но и најголемите компании треба да работат на подобрување“, изјави за „Блумберг“ генералниот директор на АСМЛ, Кристоф Фуке.

Според прогнозите на аналитичарите на „Блумберг интелиџенс“, АСМЛ би можел да постигне највисоки продажби во 2026 година, односно меѓу 34 и 39 милијарди евра, засновани на силниот раст на нарачките во последниот квартал од 2025 година и големиот број на недовршени нарачки за системи за чипови. ТСМЦ, најголемиот производител на чипови, веќе најави капитални инвестиции од над 52 милијарди долари за 2026 година, што дополнително ќе ја зголеми побарувачката за машини на АСМЛ.

За компанијата, Кина останува најголем пазар во последниот квартал на 2025 година, сочинувајќи 36 отсто од нето-продажбите на системи. Сепак, АСМЛ очекува дека учеството на Кина во иднина ќе опадне на околу 20 отсто. И покрај ограничувањата на САД, кои не дозволуваат продажба на најнапредните машини во Кина, кинеските компании и понатаму купуваат постари модели на машини за производство на чипови.