„Епл“ објави рекордна квартална продажба, но предупреди на растечки трошоци за компоненти

„Епл“ (Apple Inc.) оствари рекордна квартална продажба и даде подобра прогноза од очекуваното за тековниот период, иако предупреди дека растечките трошоци за компоненти се закануваат да ги притиснат маржите.

Приходите ќе пораснат од 13 до 16 отсто во вториот квартал, кој трае до март, соопшти компанијата во четвртокот за време на конференциски повик со аналитичарите. Тоа ја надмина проекцијата од 10 отсто на Волстрит, што покажува дека „Епл“ може да го задржи замавот по продажниот бум поттикнат од „ајфон“ во декемврискиот квартал.

Сепак, растот на цените на меморијата фрли дамка врз резултатите. Откако ефектот минатиот квартал беше минимален, компанијата очекува „поголемо влијание“ врз бруто-маржите во тековниот период, изјави извршниот директор Тим Кук.

„Продолжуваме да гледаме дека пазарните цени на меморијата значително растат“, рече тој.

„Епл“ соопшти и дека се соочува со одделни ограничувања во синџирот на снабдување поврзани со 3-нанометарскиот процесор за „ајфон“, како и со резервите од безжичните слушалки за „ерподс про 3“ (AirPods Pro).

Загриженоста изврши притисок врз акциите на „Епл“, кои осцилираа во продолженото тргување по објавувањето на резултатите. До 18:33 часот во Њујорк, тие беа во плус помалку од 1 отсто. Акцијата годинава беше во минус 5 отсто, наспроти растот од 1,8 отсто кај индексот S&P 500.

Приходите во сезоната на празници значително ги надминаа процените на Волстрит, поттикнати од силната побарувачка за новиот „ајфон 17“, растот на услугите и закрепнувањето во Кина.

Продажбата скокна за 16 отсто, на 143,8 милијарди долари, во периодот што заврши на 27 декември. Аналитичарите во просек очекуваа 138,4 милијарди долари, според податоци собрани од Блумберг. Самата компанија прогнозираше раст од 10 до 12 отсто.

„‘Ајфон’ го имаше најдобриот квартал досега, поттикнат од невидена побарувачка, со рекорди во сите географски сегменти“, наведе Кук во соопштението за резултатите.

Bloomberg

Резултатите го одразија успехот на најновиот „ајфон“, производствената линија што носи приближно половина од приходите на „Епл“. Повисоките, поскапи верзии на уредот беа особено популарни, што дополнително ги поттикна продажбата и профитот на компанијата.

Но, во кварталот имаше и послаби точки, вклучувајќи ги и бизнисите со компјутерите „мек“ и носечките уреди. Компанијата се соочува и со загриженост околу нејзиниот напор во областа на вештачката интелигенција, кој годинава ќе биде реорганизиран по неодамнешните „сопнувања“. „Епл“ исто така се справува со царини, за кои соопшти дека создале негативен ефект од 1,4 милијарда долари во празничниот период.

Компанијата со седиште во Купертино, Калифорнија, во последниве месеци повторно ја врати титулата најголем продавач на паметни телефони во светот, престигнувајќи ја „Самсунг електроникс“ (Samsung Electronics Co.).

„Сепак, одржувањето на таа доминација е можеби понеизвесно од кога било, бидејќи зависи од вистинските одлуки околу цените и развојот на следната генерација уреди, особено носечките и очекуваниот преклоплив ‘ајфон’“, напиша аналитичарот на „Емаркетер“ (Emarketer), Џејкоб Борн.

Заработката по акција порасна на 2,84 долари во првиот фискален квартал, надминувајќи ја просечната процена од 2,68 долари. Во Кина, „Епл“ пријави приходи од 25,5 милијарди долари, што е раст од 38 отсто во споредба со пред една година. Волстрит очекуваше 21,8 милијарди долари од тој клучен пазар.

Приходите од „ајфон“ изнесуваа 85,3 милијарди долари во периодот, над процената од 78,3 милијарди долари. Самата компанија прогнозираше двоцифрен процентуален раст, а продажбата на крајот се зголеми за 23 отсто на годишно ниво.

Услугите беа уште еден двигател на растот, носејќи 30 милијарди долари во кварталот. Тоа е раст од 14 отсто во однос на истиот период лани и во согласност со очекувањата.

Приходите од компјутерите „мек“ паднаа за 6,7 отсто, на 8,39 милијарди долари, под очекувањата од 9,13 милијарди долари. „Ајпад“, пак, оствари продажба од 8,6 милијарди долари, што е раст од 6,3 отсто на годишно ниво, над процената на Волстрит од 8,18 милијарди долари.

Секторот на „Епл“ за носечки уреди, дом и додатоци остана слаб. Продажбата падна за 2,2 отсто, на 11,5 милијарди долари, додека аналитичарите очекуваа 12,1 милијарди долари.