„Стопанска банка“ АД Скопје лани оствари добивка од 54,1 милиони евра

„Стопанска банка“ АД Скопје во текот на 2025 година оствари добивка од 3,33 милијарди денари, (54,1 милиони евра), што е намалување во однос на претходната година кога добивката на банката изнесуваше 3,54 милијарди денари (57,6 милиони евра), покажува неревидираниот неконсолидиран биланс на успех на банката објавен преку Македонската берза.

Од банката информираа дека нето-приходите од камати се намалени за 13 проценти во однос на претходната година како резултат на трендот на намалување на каматните стапки поради промените во референтните каматни стапки и соодветното приспособување согласно конкуретните движења.

„Притоа најголемо учество имаат каматните приходи од кредитни активности, каматните расходи на депозитите поради зголемување на салдата, како и трансфер на значителен износ од сметки по видување во категорија на орочени депозити. Како компензаторен механизам се каматните приходи од позициите за ликвидност (меѓубанкарски пласмани, депозити и вложувања во хартии од вредност), кои поради зголемување на салдата, придонесоа со поголеми каматни приходи“, наведуваат од банката.

 

Оттаму додаваат дека нето-приходите од провизии и надоместоци се намалени за 14 проценти во однос на 2024 година, пред сè, како резултат на зголемените расходи од провизии кои ги наплатуваат добавувачите на соодветните сервиси, најмногу во делот на картичното работење, со истовремено намалување на тарифните ставки кај одредени сервиси во интерес на клиентите.

Од банката посочуваат дека и покрај сè уште присутните инфлаторни притисоци и ценовни флуктуации, продолжуваат со оперативна ефикасност во однос на контролата на трошоците од работењето. Притоа, останатите расходи од дејноста и трошоците за вработени се малку повисоки во однос на истиот период од претходната година, пред сè, како резултат на инфлаторните движења и промени во пазарните цени.