„Рио Тинто“ се повлече од обидот за создавање на рударски гигант

„Рио Тинто“ (Rio Tinto Group) се повлече од разговорите за преземање на „Гленкор“ (Glencore Plc), откако двете страни не успеаја да се договорат за вредноста на помалата компанија. Ова го стопира потенцијалниот мега-договор за создавање на најголемата рударска компанија во светот.

Во соопштение, „Рио Тинто“ објасни дека не планира да понуди преземање на својот помал ривал и дека според регулативата на Обединетото Кралство, компанијата не би можела да го повтори обидот најмалку шест месеци, освен во специфични околности.

Преговорите започнаа во јануари, а спорот се водеше околу премијата што „Рио Тинто“ би требало да ја плати. „Гленкор“ бараше однос на размена на акции кој би им дал околу 40 отсто удел на инвеститорите во комбинираната компанија. „Рио“, сепак, се повлече откако не можеше да ја оправда премијата, а помалата компанија не беше подготвена да го смени својот став.

Акциите на „Гленкор“ паднаа до 11 отсто по објавата. Компанијата истакна дека останува фокусирана на своите цели и дека има силни аргументи за работење како самостојна компанија. ,„Рио Тинто“, пак, објасни дека не можела да постигне договор кој ќе донесе вредност за своите акционери.

Идејата за спојувањето на двете компании се разгледуваше повеќе од една деценија – првпат пред глобалната финансиска криза во 2008 година, потоа повторно во 2014 година, и најактивно во 2024 година. Последните преговори беа најблиску до договор, но разликите во процената на рударското и трговското работење на „Гленкор“, како и различните менаџерски култури, останаа непремостливи.

Доколку договорот беше склучен, „Рио Тинто“ ќе го удвоеше производството на бакар и ќе станаше најголем светски производител, додавајќи околу милион тони идно производство на бакар во своето портфолио, во услови на рекордно високи цени на пазарот.