.webp){kind=icon}
Додека расте бројот на граѓани што работат на фриленс-проекти, во Македонија сè уште недостига правна регулатива што ефикасно ја уредува оваа дејност.
Во државата и натаму се недостапни низа платежни системи што ќе им го олеснат начинот на трансфер и користење на своите пари, принудени се да користат посреднички услуги од други компании, за што се изложени на дополнителен трошок, а проблеми има и со регулацијата на пензиското и здравственото осигурување, како и до докажувањето кредитоспособност пред банките.
Поради недоволната регулираност, најголем дел фриленсери во земјава работат во сивата зона, а со тоа губи и државата.
„Поголемиот дел од оние легислативи што не се доволно ажурирани е во однос на наплата од странство. Не дека тоа не може да се изведе, имаме платформи што веќе го работат тоа и на некој начин можеме да стигнеме до нашите пари. Но целата таа ситуација не е доволно добро организирана за да ги охрабри повеќето фриленсери да си ги пријават парите, да ги повлечат во Македонија, да платат данок, што нели целта на државата е да собере што повеќе данок и да ја охрабри оваа заедница и да го олесни патот, да ѝ даде одредени олеснувања или законски некако да ги прифати за да може да се пријават, да можат да си платат придонеси, здравствено осигурување. Така што не е дека легислативата експлицитно ни забранува да се прави ова како дејност, туку ни го отежнува патот. Самото тоа отежнување резултира со тоа што повеќе луѓе одлучуваат да не ги повлекуваат парите во Македонија и на тој начин се јавува повторно еден вид сива зона, каде што луѓе живеат и работат во Македонија, а државата нема приход од истите тие. Оваа заедница е голема и приливот е доста голем, така што државата мора да ја негува оваа заедница, затоа што е доста важна за неа“, вели Горјан Стојановски, кој долги години работи на фриленс-проекти.
Освен за правната регулатива, со Стојановски зборувавме и кои сектори се најбарани во ова поле, од каде да се почне и како да се дојде до клиенти.
„Има повеќе начини да се дојде до проекти, но најлесно, особено за почетниците, е користење на платформите како 'Апворк', 'Фивер' и многу други што го олеснуваат работењето и даваат пристап до многу клиенти и работа. Во однос на тоа кои се најбарани индустрии, тие се исти како на редовниот пазар, но овде сме ограничени со тоа што работата треба да може да се работи на далечина. Што значи најпопуларни убедливо се девелоперите и софтверските инженери и други позиции како мрежни инженери и сè што произлегува од таа индустрија, а втори најбарани убедливо се позициите од дигиталниот маркетинг, односно помош при продажба онлајн. Трето би биле креативците, сите оние што работат графички дизајн, видеопродукција, 3Д-анимации итн. Тие се најпопуларни индустрии што се работат моментално онлајн и се најдобро платени“, вели Стојановски.
Целиот разговор погледнете го на видеото во рамките на објавата.
