.webp){kind=icon}
E-трговијата е меѓу главните приоритети на ЦЕФТА за развивање регионален пазар за онлајн трговија и намалување на трошоците на компаниите. Пакетот договори е веќе донесен, но има уште неколку чекори пред да почне реалната имплементација.
„Од олеснувањето на е-трговијата ќар ќе имаат и компаниите и потрошувачите“, вели во интервју за „Блумберг Адрија“ Здравко Илиќ, виш експерт за трговија со услуги во Секретаријатот на ЦЕФТА.
„Ако сте вие, да речеме, македонска компанија и сакате да се пласирате на нови пазари во вашето опкружување, за навистина да одите таму и за да ги нудите вашите производи на еден безбеден начин за вас и вашето работење, вие би требало да направите една анализа на тамошните закони, да видите со што треба да се ускладите за вашата услуга да може легално да се продава таму. Со концептот што го нуди одлуката за електронска трговија, вашата обврска за најголем дел од прашањата всушност се однесува само на законите на вашиот пазар, а потоа можете безбедно да ги продавате своите стоки и услуги онлајн и на други пазари. Тоа значајно ги намалува вашите трошоци, а со самото тоа се намалува и цената што ја плаќа потрошувачот. Друг дел што е многу важен е што нашите анализи покажаа дека ако се гледа според цените за достава од еден пазар на друг по километар - тие се значително повисоки во споредба со доставата во рамките на еден пазар. Ако на пример сакате од испратите нешто од Скопје до Ниш, тоа е многу поскапо отколку од Скопје до Гевгелија. Така што нашата цел е да се обидеме да ги намалиме тие цени“.
Сепак, и натаму постојат предизвици за подобра имплементација и поттикнување на онлајн трговијата во земјите од Западен Балкан, кои во овој сегмент заостануваат зад земјите од ЕУ.
„Дигитализацијата на компаниите е една голема тема, која опфаќа различни елементи. Од регионален аспект се многу важни и царините. Ние во ЦЕФТА се обидуваме да направиме брз проток на информации за производите што се нарачуваат онлајн, така што царината и пред да дојде пакетот да има информации и да се обезбеди брз проток на стока. Постојат многу работи што треба да се подобрат и во рамките на компаниите и кај поединците, да се унапредат дигиталните вештини во организациите на фирмите... Важен сегмент е и можноста за дигитално плаќање. Од тој аспект мислам дека Балканот сепак оди во добар правец...“, вели Илиќ.
Со него разговаравме и за главните предизвици на земјите од Западен Балкан, како инфраструктурата за подобрување на трговијата и дефицитот од работна сила. Целото интервју погледнете го во рамките на емисијата „Зум ин“.
