.webp){kind=icon}
Затегнувањето на монетарната политика и растот на референтните каматни стапки не се завршени, вели даночниот експерт Павле Гацов во интервју за „Блумберг Адрија“.
„Трендот на намалување на инфлацијата е побавен од она што се очекува и може да имаме уште две зголемувања на основната каматна стапка од по 0,25 п.п. за да се заузди базичната инфлација, која е сè уште висока, додека кај надворешната инфлација веќе имаме одредено намалување“, вели Гацов.
Во однос на ставот на ММФ, од каде што стигна порака дека солидарниот данок што владата го најавуваше, но не се реализира, сепак треба да биде донесен, Гацов смета дека фактот што не се воведе тоа екстра-оданочување има политичка димензија.
„Овој данок беше калкулиран и некако се повикуваа на солидарноста како основа за негово воведување. Односно се калкулираше дека ќе го плаќаат компаниите што во пандемијата поминаа доста добро. Според калкулациите, требаше да зафати околу 200 македонски компании. Но, еве, засега ништо не се случува, процената е можеби дека политичката цена за воведување ваков данок би била превисока. Особено имајќи предвид дека 2024-та ќе биде изборна година и дека тоа може да има одраз на актуелната власт. Се разбира, калкулирањето на овој данок и, еве, невоведувањето од една страна ги ослободи компаниите дека можеби во 2023-та нема да го имаат овој даночен товар. И ваквата најава од ММФ приближно ги затече повторно, иако измина веќе половина година. Така што калкулирањето, според мојот експертски став, би требало да се одложи за 2024 година“, вели Гацов.
Дополнително, Гацов, смета дека доцниме во спроведувањето на даночните реформи.
„За жал, се донесе само измена кај персоналниот данок на доход, што влезе во сила од први јануари 2023, но најавените измени кај Законот на добивка и Законот за ДДВ не се донесени, иако таму се очекуваше рестрикција на даночните ослободувања и подобрувања на оној режим на добра што се пресметуваат со 5 отсто да се пренесат во оданочувања со 10 отсто, бидејќи се сметаат дека не се најважни добра за животниот стандард на граѓаните и може да се направи извесна корекција. Но, за жал, не се донесоа овие измени и мислам дека има политичко влијание, односно неусогласеност меѓу власта и опозицијата. Сепак сметам дека не треба да се напушти овој план, но, секако, на средина на годината не е добро да се прават овие измени, туку да се почека за почетокот на следната година“, вели Гацов.
Тој зборуваше и за наплатата на приходите од ДДВ, која сега е подобрена, но и за очекувањата до крајот на годината.
