text size
Во однос на дигитализацијата, Македонија има оценка што е малку пониска во споредба со регионот, во анализата што минатата година беше спроведена од Организацијата за економска соработка и развој. Притоа, оценето е дека дигитализацијата на ММСП во регионот заостанува зад развиените земји, што упатува на потреба од понатамошно унапредување, покажува анализата за финансиската писменост во Југоисточна Европа.
Дејан Павлески, консултант за дигитална трансформација во „Даталаб“, во интервју за „Блумберг Адрија“ вели дека треба да се зголеми свесноста кај менаџерите за потребата од дигитална трансформација. Тој посочува дека приватниот сектор подобро напредува во однос на јавниот.
Блумберг Адрија
„Факт е дека Македонија не може да се пофали дека води во дигиталната трансформација во регионот. Напротив, компаниите се трудат да направат некакви напори во дигиталната трансформација, но сепак сме некаде со оние земји што треба да сработат уште многу“, посочува Павлески.
Ако се земе предвид што значи дигиталната трансформација, пред сè таа е начин на размислување од страна на менаџментот, меѓутоа и од страна на вработените да бидат подготвени за такви промени.
„Дигиталната трансформација нема некоја општоприфатена дефиниција, меѓутоа е еден логичен тек на тоа што започна пред 30-40 години, со менувањето на аналогните со дигиталните технологии и сè поголемата понатамошна нивна примена во секојдневниот живот и во деловното работење, за да дојдеме до момент кога дигиталната технологија е буквално наше секојдневие и можностите што ги нуди се од исклучителна важност за бизнисите“, посочува Павлески.
Тој додава дека она што треба да го направат нашите компании е да се приклучат кон овој тек и да бидат свесни за промените.
„Состојбата во јавниот сектор е уште полоша од онаа во приватниот сектор. Се користат многу застарени технологии, иако има некои алатки како што се е-услуги. Се правеше некакво поврзување на институциите, меѓутоа факт е дека сè уште треба уште многу да се работи, бидејќи се користат застарени алатки или воопшто нема алатки и нема соодветно поврзување на институциите, па, така, тие системи функционираат како самостојни острови“, посочува Павлески.
.webp){kind=icon}
