.webp){kind=icon}
Недвижностите и натаму остануваат едни од поатрактивните опции за инвестирање, со оглед на тоа како пазарот на недвижности ја следи инфлацијата.
Оние што во последниве години инвестираа во недвижности во Македонија сега се во предност, со оглед на рекордниот раст на цените во 2023 година.
„Повратот на инвестицијата на оние што инвестираа пред кризата поради ковид е над 20-30 отсто“, вели во интервју за „Блумберг Адрија“ Андреа Серафимовски, претседател на Здружението на градежништво при Стопанската комора на Македонија.
Bloomberg Adria
„Кризата поради ковид нè научи дека секоја инвестиција во недвижности е добра инвестиција и дека на долг рок се исплати. Кој инвестира во недвижнини, ретко губи“, вели Серафимовски.
Сепак, Серафимовски потенцира дека е потребно мудро инвестирање, бидејќи сè погласно се зборува на пазарот за неквалитетни градби.
„Откако поскапеа цените за станбен квадрат во Скопје, сведоци сме на многу анализи и сугестии за квалитетот на становите. Претходно го немаше тоа, но сега, со растот на цените, кога граѓаните треба многу повеќе да одделат од џебот, тоа стана големо прашање и има големи реакции. Ние може да сугерираме граѓаните да купуваат од проверени компании, од компании што низ годините создавале доверба кон свои купци, компании каде што е евидентен квалитетот во изградбата на становите, а сè помалку да купуваат станови од компании што не се докажани. Но со оглед на тоа дека кај нас има една специфика, уште на почетокот на изградбата на станбените објекти, ако е атрактивна локацијата, 80 отсто од станбениот простор е веќе продаден, што значи дека без да видиме за каков квалитет на стан плаќаме, понатаму сè останува на инвеститорот и неговата волја дали ќе биде така како што ветил или ќе го изгради со многу послаб квалитет. Така што сметам дека народот во принцип сè повеќе има информации, сè повеќе чита, и дека ќе дојдеме до посакуваното ниво дека секој што ќе купи недвижност ќе си ја оцени недвижноста во вистинска смисла и ќе знае што да очекува“, вели Серафимовски.
Bloomberg Adria
Во однос на цените, пак, извесно е дека и 2024 година ќе ја почнеме со рекордно високи цени.
Податоците на Народната банка за третиот квартал покажаа дека намалувањето што се најавуваше не се случи, туку само забави растот на цените на становите.
„Во наредната година, пак, се очекуваат зголемена понуда и подем во високоградбата, што ќе оневозможи нереален раст на цените“, вели претседателот на Здружението на градежништво.
Сепак, тој смета дека не може да се очекува намалување, туку единствено стабилизација на цените.
„В година веќе нема да имаме определена цена во определен регион. Стабилизација значи избегнување големи осцилации на цените. Така што таа голема осцилација очекувам да се стабилизира и дека граѓаните ќе плаќаат реални цени. Специфични се нашите услови, излегуваме од една криза и на која цена ќе се стабилизира цената зависи од повеќе фактори, пред сè од понудата и побарувачката. Ние очекуваме дека во Центар и во Карпош на пример таа ќе биде некаде од 1.600 до 2.100 евра за квадратен метар. Очекуваме наредната година граѓаните помудро да инвестираат, што би довело до тоа да немаме унифицирани цени по региони и подрачја, туку цените да ја диктираат други фактори, меѓу кои и квалитетот на градбата“, вели Серафимовски.
