Голем број граѓани што сè уште чекаат термин за фотографирање и издавање патни исправи со новото уставно име на државата се принудени да ги откажуваат своите патувања.
Од туристичките агенции велат дека дел од пролетните аранжмани ги откажуваат, а се соочуваат и со намалена побарувачка за рани уплати за летни одмори.
„Имаме голем проблем со промената на името на државата, односно со ненавременото реакција за вадење на сите документи, што многу се одрази врз работата на туристичките агенции. Според нашите процени, работата опадна за околу 50 проценти, зборувам за пролетните патувања. Генерално, побарувачката е намалена, а покрај тоа имаме и откажани аранжмани што претходно граѓаните ги планирале“, вели Дарко Панов, менаџер на туристичката агенција „Оскар травел“.
Дарко Панов
Bloomberg Adria
А овој проблем носи финансиски последици за компаниите од туристичкиот сектор.
„Некои туристички агенции влегоа и во подлабоки финансиски загуби поради откажаните аранжмани, бидејќи некои од странските хотели не им ги вратија уплатените пари. Се надевам дека до почетокот на летната сезона најголемиот дел граѓани ќе имаат патни исправи и ќе може да патуваат“, вели тој.
Bloomberg Adria
Панов очекува и оние што немаат патни исправи да се насочат кон домашните туристички дестинации.
„Јас би го нарекол ова ’ковид-алтернатива’. Кога беше пандемијата на ковид светот беше затворен и нашите туристи се вртеа кон домашни туристички дестинации. Сега, за жал, не сакајќи самата држава од немарност или неагилност за навремено преземање активности за издавање пасоши ги затвори граѓаните, па на некој начин индиректно помогна, условно речено, кон заживување на домашниот туризам. Сепак, мислам дека оние што сакаат да патуваат надвор ќе се потрудат на секој можен начин да стигнат до пасош, иако бројката и натаму е голема. Меѓутоа, не станува збор само за туристи, тука имаме и разни други видови патувања и граѓаните се спречени да ги остварат своите потреби надвор од државата“, вели Панов.
.webp){kind=icon}
