Одлуката на Европската централна банка за намалување на каматните стапки, најверојатно ќе ја следи и Народната банка која веќе го најави можниот пад на каматните стапки. Со оглед дека економскиот раст за првиот кваратал од годинава е 1,2 отсто, а инфлацијата се движи околу три до четири отсто, ризици сепак постојат. Она што во следниот период ќе биде исклучително важно е добра координираност меѓу фискалната и монетраната политика, вели за „Блумберг Адрија“, Синиша Наумоски, претставник на Управниот одбор на институтот за бизнис и менаџмент „Хајделберг“ во Скопје.
„Оптимист сум дека ќе има намалување, но не смееме да бидеме претерани оптимисти дека тоа ќе биде често“, вели Наумоски.
Од моментот на зголемување на каматните стапки, многу побавно забавуваше кредитирањето, а сега истото се очекува и со намалувањето на каматните стапки, особено во Македонија.
Синиша Наумоски
Bloomberg Adria
„Македонските банки пливаа во ликвидност и таа беше доволна за да можат да пласираат кредитен раст кој што и сега се движи некаде 6,8 отсто. Замислете, со ваква состојба на каматните стапки кредитниот раст е околу 6,8 отсто што значи тоа многу побавно се прелева од монетарната политика“, вели Наумоски.
Тој во втората половина на 2025 година очекува стабилизирање на она ниво на коешто бевме пред пандемијата, но тоа нема да значи враќање на цените на истото ниво.
Ставот на ЕЦБ продолжува да биде дека понатамошните одлуки ќе зависат од податоците, особено од движењето на платите кои продолжуваат да растат со солидни стапки низ еврозоната поради многу тесниот односно затегнатиот пазар на труд. Сепак сè уште постојат ризици поради кои ЕЦБ ќе мора да биде претпазлива. Во однос на ЕЦБ, Наумоски очекува едно или две намалување на каматните стапки во последниот квартал од годинава додека во текот на летото би биле претпазиливи.
„Затоа што има една реченица, еден збор помеѓу фелата во Франкфурт дека сè уште инфлацијата е леплива“, заклучува Наумоски.