.webp){kind=icon}
Извршниот одбор за монетарна политика на НБРМ заседава утре и носи одлука за каматните стапки. Очекувањата се дека нашата централна банка ќе ја следи ЕЦБ, смета Бојан Цветановски член на ИО на „АЦИ Македонија“, во интервју за „Блумберг Адрија“.
„Сметам дека НБРМ ќе направи едно намалување на каматните стапки. Дали тоа ќе биде неделава или на следниот состанок, ќе видиме, но секако не исклучувам дека е можно да биде и неделава. Мислам дека ќе има едно намалување од 30 базни поени на каматната стапка на благајничките записи, значи од 6,30 на 6 отсто, а, се разбира, натамошните потези ќе зависат од податоците пред сè во врска со инфлацијата“, вели Цветановски.
ЕЦБ на минатата седница каматните стапки ги остави непроменети.
„Претседателката Лагард остави отворена врата, остави шанси во следниот период да има олабавување на монетарната политика, намалување на каматните стапки“, вели Цветановски.
Бојан Цветановски (ТВ-гостување)
Bloomberg Adria
Во еврозоната намалувањето на инфлацијата од повисоките бројки до три проценти одеше брзо, меѓутоа сега од три до два проценти, колку што е целта на ЕЦБ, оди бавно.
„Сега стапката на инфлација во еврозоната е 2,5 отсто. Ако инфлацијата се намалува со бавни чекори, и падот на каматите ќе оди со бавно темпо“, вели Цветановски.
Тој смета дека очекувањата се оти во септември ЕЦБ ќе изврши намалување уште за 25 базични поени и дека ќе има и натамошни намалувања.
Фед има две цели - одржување ценовна стабилност и одржување состојба на полна вработеност.
„Во 2022-2023 година акцентот беше ставен на ценовната стабилност, значи на борбата со инфлацијата. Беше постигната некоја стапка на невработеност од 3,5 отсто, што е рекордна ниска стапка невработеност. Оттогаш наваму, особено во последните месеци, состојбата на пазарот на трудот почнува да се влошува со некој мал чекор, односно од таа минимална стапка на невработеност од 3,5 отсто, сега има податок дека стапката на невработеност е 4,1 отсто“, вели Цветановски.
Невработеноста се зголемува, а инфлацијата забавува
САД долго време се движеа околу бројката од 3,5 отсто годишна стапка на инфлација, меѓутоа во последните месеци, според последниот податок за јуни, доаѓа до стапка на инфлација од три отсто. Тоа значи дека сега постепено САД можат од борба со инфлацијата да се пренасочат кон стабилизација на пазарот на работна сила. Тоа значи да се интервенира преку намалување на каматните стапки.
Според Цветановски, веќе може да се зборува за можноста за олабавување и на стапките на американскиот договор и се очекува дека тоа нема да се случи во јули, туку првото олабавување од 25 базични поени да се случи во септември.
„Доколку го започнат тој циклус на намалување на каматни стапки, тоа може да оди со поголема динамика. Значи можно е да дојдеме и до брзо намалување од 150 базни поени, до стапка од четири проценти. Меѓутоа многу е важно кога ќе биде направен тој прв чекор“, вели Цветановски.
