.webp){kind=icon}
Во индустријата на луксузот зборуваме за сè попребирливи клиенти и нова демографија на потрошувачи. Пренесувањето на богатството кон помладата генерација укажува дека промените во овој сектор се неопходни. Како се приспособуваат лидерите во луксузната индустрија?
Во наредните години се очекува значајна генерациска промена во богатството. Според податоците на „Велт икс“ (Wealth-X), до 2030 година треба да поминат 15 илјади милијарди долари од една генерација кај друга. Овој трансфер на богатство во суштина се совпаѓа со клучните демографски промени, бидејќи се очекува милениумците да сочинуваат значителен дел од пазарот на луксузот до 2026 година.
„Оваа културна промена ги поставува стандардите за луксузната индустрија“, вели Фарук Нефзи, маркетинг-директор на „Фидшип“ (Feadship), еден од водечките светски производители на суперјахти. Тој наведува примери од брендови што презеле значителни напори за реинвестирање за да си обезбедат долговечност и конкурентност. Илустративен пример е „Хермес“, кој од реномиран производител на коњски седла стана почитуван бренд на луксузни модни додатоци. „Оваа историска трансформација ја нагласува потребата за приспособливост и еволуција во луксузната индустрија со цел да остане не само релевантна туку и успешна во светлината на променетите парадигми“, истакнува Нефзи.
Фарук Нефзи/Bloomberg Businessweek Adria
Како ќе се приспособиме на новите клиенти?
„Милениумците и генерацијата зед им даваат приоритет на искуствата и, спротивно на она што многумина мислат, сè уште имаат апетит за поседување, бараат одржливост и етички практики и бараат автентични, персонализирани интеракции со брендовите. Тие се дигитално вешти, очекуваат транспарентност и ги ценат брендовите што се усогласуваат со нивните вредности“, вели тој. „За да се ангажираме со милениумците и со генерацијата зед, користиме дигитални платформи, ја нагласуваме одржливоста во нашите дизајни, нудиме опции за персонализација и секако не забораваме да бидеме забавни“, вели Нефзи. Притоа тој додава дека тие користат дигитални алатки, како што се виртуелни тури, проширена реалност и интерактивни веб-страници, за да го подобрат искуството на нивните клиенти. Како пример, тој ги наведува „ремек-делата“ на онлајн галеријата на „Фидшип“ (Feadship) - Откривање невидени дизајни на јахти и уникатни уметнички дела (од англиски: Unveiling Unseen Yacht Designs and Unique Artworks).
Овој онлајн портал содржи досега невидени дизајни на јахти, вклучувајќи ги и оние што се создадени во соработка со светски познати автомобилски брендови и познат холандски уметнички фотограф. Порталот е дизајниран да ја одразува атмосферата на уметничка галерија и бродоградилиште, со „пристаништа“ на кои може да се клика за да се види дизајнот. Во центарот на оваа конструкција е скулптурната форма на јахтата „Пјур“ (Pure), нов концепт на јахта од следната генерација, долга 81,75 метри, која може да се истражува во 3Д од сите страни и внатре и надвор, објаснува Нефзи.
Со цел да ја доближи својата филозофија уште поблиску до јавноста, „Фидшип“ лансираше и свој поткаст. Во серијата од седум епизоди „Фидшип анкаврд“ (Feadship Uncovered), новинарот и писател Џон Вајч влегува во светот на нарачана креација откако ќе добие понуда што не може да ја одбие: да дизајнира своја јахта од нула. Неговото патување започнува со празен лист хартија, а она што следува е поглед зад сцената на еден од најексклузивните брендови.
Кои се купувачите на луксуз?
Клиентите на „Фидшип“ се ултрабогати луѓе, кои доаѓаат од различни региони: Северна Америка (40 проценти), Европа (30 проценти), Азија (15 проценти) и преостанатиот процент од други делови на светот. Тие претставуваат некои од највлијателните личности на светската сцена. Многу од нив се искусни сопственици на јахти, добро упатени во суптилностите на јахтата и не бараат посебен вовед во индустријата. Исто така, приоритет е инвестирањето во нови генерации корисници. „Неодамна бев вклучен во лансирањето на нов возбудлив потфат наречен ’Јанг фидшип’ (Young Feadship). Оваа иницијатива ја илустрира нашата посветеност за поттикнување и зајакнување на следниот бран лидери во индустријата. За да останат понапред од конкуренцијата во луксузниот пејзаж, брендовите треба да инвестираат во различни области и да ги задоволат холистичките потреби на потрошувачите“, заклучува Нефзи.
Иако западниот свет и Кина сè уште се клучни пазари, надвор од очекуваните територии се појавуваат нови можности, се согласуваат нашите соговорници. Блискиот Исток, со очекувани годишни стапки на раст од 11 проценти, претставува пазар од околу 12 милијарди евра, поттикнат од зголемениот интерес што доаѓа од информираните и вмрежени млади генерации. Индија доживува значителен раст, поттикнат од растечкото богато население и поедноставениот даночен систем и логистика, како и од зголемениот интерес од меѓународните луксузни брендови. Други светли точки се Иран, Бразил, Австралија, Тајланд и Сингапур.
Кристоф Д'ориа ди Сирие/Bloomberg Businessweek Adria
Кристоф Д'ориа ди Сирие, кој реализираше најголем број свои проекти во Јужна Кореја и Јапонија, особено го нагласува интересот на овие земји за иновации, искуствен момент во комерцијалните простори, и го наведува нивниот фокус на силниот колективен идентитет како причина за тоа. „Мислам дека клучот е градењето емотивна врска. Ако луксузните брендови не можат да предизвикаат емоции, ризикуваат да станат стока. Со толку многу достапни избори, традиционалниот продажен ’терен’ заснован само на квалитетот повеќе не е толку моќен. Вистински диференцијатор? Интересна приказна и естетика што поттикнува колективен идентитет, која одекнува кај клиентите на подлабоко ниво“, заклучува тој.
